Posted: 03/24/2013 08:47 AM IST

సంజయ్ దత్ కి జైలు శిక్ష ఖరారు అవటం పట్ల చాలా మంది చాలా రకాలుగా అన్నారు. ప్రెస్ కౌన్సిల్ ఆఫ్ ఇండియా ఛైర్మన్ మార్కండేయ కట్జూ అతనికి క్షమాభిక్ష పెడితే బావుంటుందనే అభిప్రాయాన్ని వెలిబుచ్చారు. అన్నా హజారే కూడా తన వ్యాఖ్యలు తాను చేసారు. అలాగే తలా ఒక రకంగా మాట్లాడారు. ఎక్కువగా సంజయ్ దత్ గురించి బాధనే వ్యక్తపరచారు. అదేవిధంగా, ఎప్పుడూ ఏదో ఒక విధంగా వార్తల్లోకి ఎక్కాలనే కుతూహలం కనబరచే రాఖీ సావంత్ కూడా తనవంతు వ్యాఖ్యలు తానూ చేసింది.

సంజయ్ దత్ కి బదులు నేను జైలుకి వెళ్ళటానికి తయారు అంటోంది. అది ఎలాగూ జరిగే పని కాదని తెలుసు కానీ సంజయ్ దత్ గురించి తనలో కలిగిన బాధను వెక్కి వెక్కి ఏడుస్తూ వెలిబుచ్చిందామె. సంజయ్ దత్ కో కుటుంబం ఉందని, తను ఒంటరిదే కాబట్టి తనకే తేడా రాదని చెప్పింది రాఖీ.

సెట్ లలో కూడా అమ్మో నన్ను ముద్దు పెట్టుకున్నాడని, మరీ ఎక్కువగా చేసేస్తున్నాడని తన తోటి కళాకారులతో గొడవపెట్టుకుంటూ వార్తల్లోకి ఎక్కే అలవాటు చాలా ఉంది రాఖీకి అని చాలా మంది అభిప్రాయపడతారు. అలాంటి రాఖీ సావంత్ గురించి ఎవరూ వ్యాఖ్యానించరనుకుంటే అది ఆమె పొరపాటే అవుతుంది. సానియా మీర్జా పెళ్ళి చేసుకుని పాకిస్తాన్ వెళ్ళి పోతున్నప్పుడు భాజపా లాంటి పార్టీలు అభ్యంతరం తెలియజేస్తుంటే, మాకేం అభ్యంతరం లేదు- ఇక్కడ మరో ఆవిడుంది ఆవిడను కూడా తీసుకుపోతే మేం ఇంకా సంతోషిస్తాం- ఆమె పేరు రాఖీ సావంత్ అన్నారు శివసేన నాయకుడు థాకరే.