Posted: 10/22/2012 02:58 PM IST

       పవర్ స్టార్ పవన్ కళ్యాణ్ హీరోగా నటించిన కెమెరామెన్ గంగతో రాంబాబు సినిమా ఇప్పుడు సినీ,  పొలిటికల్ వర్గాల్లో హాట్ టాపిక్ అయికూర్చుంది.  వైయస్ జగన్ సూచన మేరకే పూరీ జగన్నాథ్ ఈ సినిమా ప్లాన్ చేసాడని వార్తలు షికారు చేస్తున్నాయి. కాంగ్రెస్ పార్టీలో చిరంజీవిని అభాసుపాలు చేసేందుకు తెలంగాణలో పవన్ ఇమేజ్ ని పూర్తిగా దెబ్బకొట్టాలనే వైఎస్ జగన్ మోహన్ రెడ్డి పక్కా ప్లానింగ్ తో ఈ సినిమా చేయించినట్టు ఫిల్మ్ నగర్ లో వినికిడి.  అంతేకాదు తద్వారా ఇటు సీమాధ్రలో సమైఖ్య రాగాన్ని మరింతగా ప్రభలించి, అటు తెలంగాణలో కాంగ్రెస్ పార్టీని, మెగా, పవన్ ఇమేజ్ ని డ్యామేజ్ చేయాలనే జగన్.. పూరీ చేత ఈ వ్యూహరచన చేయించాడని అంటున్నారు.
       ఈ తరుణంలో వైయస్సార్ కాంగ్రెస్ పార్టీతో దర్శకుడు పూరీ జగన్నాథ్ సంబంధాలు మరోసారి చర్చనీయాంశంగా మారాయి. పూరీ జగన్నాథ్ గతంలో వైయస్ రాజశేఖర రెడ్డిపై సినిమా తీస్తానని ప్రకటించారు. కానీ, అది ఎందుకో కార్యరూపం దాల్చలేదు. వైయస్ రాజశేఖర రెడ్డిపై తన అభిమానాన్ని చాటుకోవడానికి, వైయస్ జగన్ పార్టీ పట్ల తనకున్న సానూకూల వైఖరిని కెమెరామెన్ గంగతో రాంబాబు సినిమాతో తీర్చుకున్నాడని మరో రూమర్ షికారు చేస్తుంది. కాగా, పూరీ జగన్నాథ్ సోదరుడు గణేష్ వైయస్సార్ కాంగ్రెసు పార్టీలో ఉన్నారు. ఇదే విషయంపై పూరీ జగన్నాథ్‌కు మీడియా ప్రతినిధుల సమావేశంలో ప్రశ్నలు ఎదురయ్యాయి. వాటికి ఆయన సమాధానం చెప్పడానికి నిరాకరించారు. పైగా, తనను రెచ్చగొట్టే విధంగా మాట్లాడవద్దని ఓ మీడియా ప్రతినిధికి సలహా ఇచ్చారు. ఆ సలహా ఇస్తూ మీడియా సమావేశం నుంచి లేచి వెళ్లిపోయారు. కెమెరామెన్ గంగతో రాంబాబు సినిమా వివాదంపై మాట్లాడడానికి ఆయన ఈ మీడియా సమావేశం ఏర్పాటు చేశారు.
      గత ఉప ఎన్నికల సందర్భంగా ఈ ఏడాది మేలో నర్సీపట్నంలోని పూరీ జగన్నాథ్ ఇంట్లో వైయస్ విజయమ్మ, షర్మిల బస చేశారు. దానికి పూరీ జగన్నాథ్ ఎంతో మురిసిపోయారు కూడా. విజయమ్మ, తమ ఇంట్లో బస చేయడం తనకెంతో ఆనందాన్నిస్తోందని, తామంతా వారి కుటుంబాన్ని ఎంతో ప్రేమిస్తామని ఆయన పొంగిపోయారు. అంతేకాదు పూరీ జగన్నాథ్ అనుబంధం ఈనాటిది కాదు. పూరీ జగన్నాథ్ కూతురు జన్మదిన వేడులకు  జగన్ హాజరయ్యారు. అది అప్పట్లో పెద్ద సంచలమైంది. పూరీ సంతోషంపై ప్రముఖ దర్శక నిర్మాత రామ్ గోపాల్ వర్మ వ్యంగ్యాస్త్రాలు కూడా విసిరారు. ఏమైనా, కెమెరామెన్ గంగతో రాంబాబు సినిమాలో అటు చంద్రబాబును, ఇటు కెసిఆర్‌ను ఏకి పారేయడం ద్వారా వైయస్ జగన్ చాలా తెలివిగా పూరీతో పనిచేయించుకున్నాడని సమాచారం.

...avnk