Posted: 09/12/2012 11:43 AM IST

గుజరాత్‌లో ముఖ్యమంత్రి మోడీ, బీహార్ సిఎం నితీష్‌కుమార్ మధ్య పోటీ తప్పేలాలేదు. బీహార్‌లో జెడియు, బిజెపి కూటమి అధికారంలో ఉన్న సంగతి తెలిసిందే. బీహార్ అసెంబ్లీ ఎన్నికల నుంచి మోడీ, నితీష్ కుమార్ మధ్య దూరం పెరుగుతూ వచ్చింది. కరుడుగట్టిన హిందుత్వవాదిగా ముద్రపడిన మోడీ తమ రాష్ట్రంలో ఎన్నికల ప్రచారం చేస్తే అంగీకరించేది లేదని నితీష్‌కుమార్ కరాకండిగా చెప్పారు. రాష్ట్రంలో సంకీర్ణ ప్రభుత్వం నడుస్తున్నప్పటికీ రెండు పార్టీల మధ్య సంబంధాలు అంత సవ్యంగా లేవు. ఈ నేపథ్యంలో ఈ ఏడాది చివర్లో జరిగే గుజరాత్ అసెంబ్లీ ఎన్నికల్లో ఒంటరిగానే పోటీ చేస్తామని జెడియు అధ్యక్షుడు శరద్ యాదవ్ ఇక్కడ ప్రకటించారు. బిజెపితో మిత్రత్వం కొనసాగిస్తామని అయితే గుజరాత్‌లో మాత్రం ఒంటరిగానే పోటీ చేస్తామని ఆయన చెప్పారు. గుజరాత్‌లో జెడియు ఒంటరిగా పోటీ చేస్తున్నంత మాత్రాన ఎన్డీఏ కూటమి నుంచి వైదొలగుతున్నట్టు కాదని ఒక ప్రశ్నకు సమాధానంగా బదులిచ్చారు. మరో విషయం ఏమిటంటే గుజరాత్ అసెంబ్లీ ఎన్నికల్లో శరద్ యాదవ్, నితీష్‌కుమార్ ఇద్దరూ ఎన్నికల ప్రచారం చేయనున్నారు.

గుజరాత్ తరహాలోనే బిజెపి పాలిత రాష్ట్రాల్లోనూ జెడియు ఒంటిరి పోటీకి దిగుతుందా? అన్న ప్రశ్నకు ఆయన సూటిగా సమాధానం చెప్పలేదు. గుజరాత్‌లో ఎన్ని సీట్లుకు పోటీచేస్తారన్న ప్రశ్నకు పార్టీ రాష్ట్ర శాఖ నిర్ణయంపై ఆధారపడి ఉంటుందని అన్నారు. ఇలా ఉండగా గుజరాత్ అసెంబ్లీ ఎన్నికల్లో వంద సీట్లకు పోటీ చేయాలని జెడియు రాష్ట్ర శాఖ నిర్ణయించినట్టు వార్తలొస్తున్నాయి. గుజరాత్‌లో ఒంటరిగా పోటీకి దిగడం అన్నది తమకు కొత్తకాదని ఇదివరకే ఎన్నికల బరిలో దిగామని యాదవ్ గుర్తుచేశారు. అలాగే మధ్యప్రదేశ్, ఢిల్లీ తదితర రాష్ట్రాల్లో జెడియు పోటీ చేసిందని ఆయన స్పష్టం చేశారు. రాష్ట్ర శాఖలు నిర్ణయం తీసుకుంటాయని ఆయన చెప్పారు. గతంలో కూడా తాను, నితీష్ కుమార్ కలిసి ఎన్నికల ప్రచారం చేసిన సందర్భాలున్నాయని ఇప్పుడూ ఇద్దరం ప్రచారం చేస్తామని ఎన్డీఏ కన్వీనర్ పేర్కొన్నారు. బీహార్‌లో జెడియు సారధ్యంలోని సంకీర్ణ ప్రభుత్వం ఎనిమిదేళ్ళుగా అధికారంలో ఉంది. జార్ఖండ్, రాజస్థాన్ అసెంబ్లీ ఎన్నికల్లో పొత్తు పెట్టుకుంది. పశ్చిమబెంగాల్, తమిళనాడులో సందర్భాన్ని బట్టి పొత్తు పెట్టుకుని ఎన్నికల్లో పోటీ చేసింది.