Posted: 09/03/2012 06:23 PM IST

రాష్ట్రంలో కొత్తగా ఏర్పాటైన వైఎస్ఆర్ కాంగ్రెస్ ఇప్పుడు భార్యభర్తలను కూడా వేరు చేస్తూ ఒక్కొక్కరిని తన వైపుకు లాక్కొంటోంది. ఇది చిత్తూరు జిల్లాలో సంభవించింది. అదీ అల్లాటప్పా…దంపతులను విడదీయలేదు. చిత్తూరు జిల్లాకు చెందిన ఎమ్మెల్యే సీకే బాబు అలియాస్ సీకే జయచంద్రరెడ్డి భార్య వైఎస్ఆర్ సీపీలో జాయిన్ అవ్వనుందని సమాచారం. ఈ మేరకు ఆమె వైఎస్ఆర్ వర్ధంతి సందర్భంగా చిత్తూరులో పెద్ద ఎత్తున ర్యాలీ తీశారు. దీంతో ఆమె త్వరలోనే వైఎస్ఆర్ కాంగ్రెస్ లో చేరడం ఖాయమని తెలుస్తోంది. మరోవైపు ఆమె భర్త అధికార కాంగ్రెస్ పార్టీలో కొనసాగుతున్నాడు.

మొదట్లో జగన్ వెంటనడిచిన సీకే బాబు అధికారాన్ని పూర్తి స్థాయిలో అనుభవించడానికి చివరకు అధికార పార్టీలోనే ఉండిపోయాడు. కానీ లోలోపల జగన్ తో సంబంధాలు నెరిపిన సీకే ఇప్పుడు వ్యూహాత్మకంగా భార్యను రంగంలోకి దించుతున్నాడు. ముందుగా భార్యను ఆ పార్టీలోకి పంపి ఒక టికెట్ కన్ఫర్మ్ చేసుకొని అదును చూసి తాను కూడా వైఎస్ఆర్సీపీలోకి జంప్ చేసేలా సీకే బాబు వ్యూహం పన్నుతున్నాడు. ఒకవైపు కొంత మంది కాంగ్రెస్ మంత్రులు, ఎమ్మెల్యేలు తమ కుమారులను జగన్ పార్టీలోకి పంపుతూ సీట్లు రిజర్వ్ చేయించుకొంటుంటే…సీకే బాబుకు అంత పెద్ద కొడుకు లేకపోవడంతో ఏకంగా భార్యనే రంగంలోకి దించి ఔరా అనిపిస్తున్నాడు. ఇక ఇప్పటికే ధర్మాన కృష్ణదాస్- ధర్మాన ప్రసాదరావు ద్వారా అన్నాదమ్ములను, కొంతమంది మంత్రులను కొడుకులను ఆకర్షించి తండ్రీ కొడుకులను, నన్నపనేని రాజకుమారి కూతురిని పార్టీలో చేర్చుకొని తల్లీకూతుళ్లను, పీజేఆర్ కూతురు విజయను చేర్చుకొని అన్నా చెళ్లెళ్లను(ఆమె సోదరుడు కాంగ్రెస్ లో కొనసాగుతున్నాడు) రాజకీయంగా వేరు చేసిన వైఎస్ఆర్ సీపీ ఇప్పుడు భార్యభర్తలను కూడా రాజకీయ విరోధులుగా చేసి కొత్త రికార్డు స్థాపించింది.