Posted: 08/29/2012 06:51 PM IST

పిసిసి అధ్యక్షుడు బొత్సకు పదవి గండం  తప్పేట్లు లేదు. గత వారం సీఎం, పిసిసి అధ్యక్షుల హస్తిన పర్యటన నేపథ్యంలో పార్టీ, ప్రభుత్వాల్లో నాయకత్వ మార్పులపై రకరకాల ఊహాగానాలు చెలరేగిన నేపథ్యంలో బొత్స కూడా అందుకు  తగ్గట్లు సిద్ధమైపోతున్నారు. పార్లమెంట్ సమావేశాలు ముగిసిన వెంటనే రాష్ర్ట కాంగ్రెస్ లో కీలక పరిణామాలు తప్పవని హైకమాండ్ నాయకత్వ మార్పు యోచన చేస్తుందన్న ప్రశ్నలకు పిసిసి అధ్యక్షుడు తన సన్నిహితులతో అవుననే చెప్పినట్టు సమాచారం.గత వారం నాలుగు రోజుల పాటు డిల్లీలో మకాం వేసిన బొత్స హైకమాండ్ మనస్సును గ్రహించారు. గాంధీభవన్ లో ఆయన్ను కలిసిన సన్నిహితులకు హైకమాండ్ ఆలోచనను పరోక్షంగా చెప్పేసారు. పిసిసి అధ్యక్ష పదవి తనకు పూర్తి సంతృప్తి నిచ్చిందని రాజకీయ జీవితంలో ఇంత పెద్ద పదవి లభించడం ఆనందంగానే ఉందని చెబుతున్నారని టాక్. తన తండ్రి.. తాతలు ఇంత పెద్ద పదవి అనుభవించలేదని పదవుల విషయంలో తనకెలాంటి అసంతృప్తి లేదని సన్నిహితులతో చెప్పినట్టు సమాచారం. భవిష్యత్తులో ఏ పదవిస్తారనే అంశంపై కూడా బొత్స నేరుగానే సమాధానం చెప్పినట్టు తెలిసింది.

అధ్యక్ష పదవి పోగానే ఎఐసిసిలో జనరల్ సెక్రటరీ పదవి రావచ్చని తనతో పాటు చిత్తూరు జిల్లాకు కూడా ఎఐసిసిలో చోటు దక్కొచ్చని పరోక్షంగా ముఖ్యమంత్రిని ఉద్దేశించి బొత్స మాట్లాడుతున్నారు. చిరకాల వాంఛగా ఉన్న ముఖ్యమంత్రి పదవిపై కూడా బొత్స సన్నిహితులకు వివరించినట్టు సమాచారం. తన వయస్పు ఇప్పుడు 51ఏళ్లేనని ఆ పదవి ఇప్పుడు కాకపోతే పదేళ్ల తరువాతైన అప్పుడు కాకపోతే 20ఏళ్ల తరువాతైన వస్తుందని చెప్పినట్టు సమాచారం.సన్నిహితులతో బొత్స చేస్తున్న వ్యాఖ్యలకు   కొనసాగింపుగా అధ్యక్ష పదవిపై బొత్స నేరుగానే సమాధానం చెప్పారు. కొత్త అధ్యక్షుడైన పాత అధ్యక్షుడైనా అధిష్టానం ఆదేశాల మేరకే పనిచేయాలని చెప్పుకొస్తున్నారు. మొత్తం మీద పిసిసి పదవి పోవడం ఖాయమని బొత్సకు కూడా అర్ధమైపోవడంతో ఎక్కడ లేని గాంభీర్యాన్ని ప్రదర్శిస్తున్నారు. కాంగ్రెస్ లో పదవుల రాక, పోవడాలు అధినేత్రి అనుగ్రహం మీదే ఆధారపడి ఉంటాయని వేదాంతం వల్లిస్తున్నారు.