Posted: 08/12/2012 01:54 PM IST

       2014లో అధికారం చేజిక్కించుకోవడమే లక్ష్యంగా తెలుగుదేశం పార్టీ ప్రయత్నాలు ముమ్మరం చేస్తోంది. అందుకు అందివచ్చిన ప్రతీ అవకాశాన్ని ఉపయోగించుకుంటోంది. ఇటీవలే బీసీ డిక్లరేషన్ ప్రకటించిన ఆపార్టీ ..బీసీలకు వందసీట్లు కేటాయిస్తున్నట్లు ప్రకటించింది.దీంతో బీసీ నేతలు హర్షం వ్యక్తం చేయడంతో టీడీపీలో నూతనోత్సాహం కన్పించింది. తాజాగా మరో కీలక అంశంపైనా తమ డిక్లరేషన్ ను ప్రకటించింది. ఎస్సీ వర్గీకరణకు తెరలేపింది.  ఎస్సీ వర్గీకరణకు తాము అనుకూలమని మరోసారి స్పష్టం చేసింది. టీడీపీ అధికారంలో ఉన్నప్పుడు ఎస్సీ వర్గీకరణ అంశాన్ని తెరమీదకు తీసుకువచ్చిన ఘనత తమదేనని గుర్తుచేస్తోంది. వర్గీకరణకు చట్టబద్ధత కల్పించే విషయమై కేంద్రం చొరవచూపాలని త్వరలోనే ప్రధానమంత్రికి లేఖ రాయనున్నట్లు బాబు తెలిపారు.  రాష్ట్రంలో అతిసున్నితమైన అంశాలపై తమ వైఖరిని స్పష్టం చేయాలని టీడీపీ నిర్ణయించింది.
         సుమారు 3 గంటలపాటు జరిగిన పొలిట్ బ్యూరో సమావేశంలో పలు అంశాలపై చర్చించిన పొలిట్ బ్యూరో ఎస్సీ వర్గీకరణ అంశంపై విస్తృతంగా చర్చ జరిగింది. అనంతరం వర్గీకరణపై తమ అభిప్రాయాన్ని స్పష్టం చేసింది. వర్గీకరణను మాల సామాజిక వర్గం నుంచి వ్యతిరేకత వచ్చినప్పటికి పార్టీ ప్రయోజనాల దృష్ట్యా వర్గీకరణకే బాబు మెగ్గు చూపారు. అయితే గతంలో వర్గీకరణకు అనుకూలమని ప్రకటిస్తే మాలలు దూరమయ్యారని భావిస్తోన్న టీడీపీ..మాదిగ సామాజిక వర్గమైనా తమ వెన్నంటి ఉండేలా ప్రయత్నం చేస్తున్నారు. ఎస్సీ వర్గీకరణకు అనుకూలమని ప్రకటించిన టీడీపీ... ఆ పార్టీకి ఏమేరకు లబ్ధి చేకూరుతుందో వేచి చూడాలి.

...avnk