Posted: 08/08/2012 04:13 PM IST

‘‘ఇది నిజమా? మాయాజాలమా?’’ అని ఇటీవల వెలువడిన ఐశ్వర్యరాయ్ ఫొటోని చూసి పలువురు చర్చించుకుంటున్నారు. దానికి కారణం ఉంది. తల్లయిన తర్వాత ఐష్ బొద్దుగా తయారయ్యారు. రెండు నెలల క్రితం ఆమె ఓ వేడుకలో పాల్గొన్నప్పుడు ‘లాభం లేదు. ఐష్ సన్నబడాల్సిందే’ అని బాహాటంగానే చెప్పినవారు ఉన్నారు. తన శరీరాకృతి గురించి వచ్చిన విమర్శలను ఐశ్వర్యరాయ్ పాజిటివ్‌గానే తీసుకున్నారు. సన్నబడటానికి తన ప్రయత్నాలు తను చేశారు. చివరికి సాధించారనే చెప్పాలి.ఎందుకంటే, ప్రస్తుతం ప్రచారంలో ఉన్న ఫొటోలో ఎప్పటిలా సన్నగా అగుపిస్తున్నారామె. తల్లయిన తర్వాత తొలిసారి ఒక వాణిజ్య ప్రకటన కోసం కెమెరా ముందుకొచ్చారు ఐశ్వర్యరాయ్. అది ఒక నగల దుకాణానికి సంబంధించిన యాడ్.

ఐశ్వర్య పాల్గొనగా ముంబయ్‌లో ఫొటోషూట్ చేశారు. ఆ షూట్‌కి సంబంధించిన ఫొటోయే ప్రస్తుతం ఇంటర్నెట్‌లో హల్‌చల్ చేస్తోంది.బంగారు రంగు నీళ్లల్లో ఐశ్వర్యరాయ్ జలకాలాడుతున్న ఫొటో అది. నీటి రంగు, ఐశ్వర్య వంటి రంగు పోటీపడి ప్రకాశించడం పలువుర్ని ఆకర్షిస్తోంది. అలాగే ఐష్ సన్నగా కనిపించడం ఆశ్చర్యపరుస్తోంది. ఆమె నిజంగానే సన్నబడిందా? కంప్యూటర్ మాయాజాలమా? అని చర్చించుకుంటున్నారు. ఒకవేళ ఐశ్వర్య సహజంగా బరువు తగ్గి ఉంటే అభినందించాల్సిందేనని, కథానాయికగా సెకండ్ ఇన్నింగ్స్‌లో ఆమె కెరీర్ మరింత జోరు అందుకునే అవకాశం ఉందని కూడా అంటున్నారు.