Posted: 07/28/2012 11:59 AM IST

       మంత్రుల కమిటీ నివేదిక కాంగ్రెస్ లో చిచ్చు పెడుతోంది. కమిటీ నివేదికపై విమర్శలు వెల్లువ మొదలైంది. సీనియర్లను సంప్రదించకుండా తూ.. తూ.. మంత్రంగా నివేదిక రూపొందించారంటూ విమర్శలు వస్తున్నాయి. ఈ క్రమంలో పార్టీ పటిష్టం కావాలంటే మేథోమధనం జరగాలన్న డిమాండ్ ఊపందుకుంది. అదే సమయంలో ముఖ్యమంత్రి, పిసిసి అధ్యక్షుడిపై పరోక్ష విమర్శలు వస్తున్నాయి.  ఉపఎన్నికల పరాజయంతో అయోమయంలో పడ్డ కాంగ్రెస్ పార్టీని బలోపేతం కోసం ముఖ్యమంత్రి, పిసిసి అధ్యక్షుడు చేస్తోన్న ప్రయత్నాలు వారినే ఇరుకున పెట్టేలా తయారయ్యాయి. నిజానికి మంత్రుల కమిటీ ఏర్పాటు చేసినప్పుడే అనేక విమర్శలు వచ్చాయి. కమిటీలో కేవలం మంత్రులను మాత్రం నియమించడం ఏమిటని ఎంపీ పాల్వాయి గోవర్ధన్ రెడ్డి ఆరోజే అభ్యంతరం వ్యక్తం చేసారు. ఆ విమర్శలను పెద్దగా పట్టించుకోని సిఎం, పిసిసి అధ్యక్షుడు త్వరగా నివేదిక ఇవ్వాలని కోరడంతో ధర్మాన నేతృత్వంలోని కమిటీ నెలరోజుల పాటు కసరత్తులు చేసి నివేదికను అందచేసింది. దీనిపై వెనువెంటనే విమర్శలు వెల్లువ మొదలైంది.
 
     తెలంగాణ ఎంపీలు కూడా కమిటీ నివేదికపై అభ్యంతరం వ్యక్తం చేసారు. ఇదిలా ఉంటే కమిటీపై దామోదర్ రెడ్డి చేసిన విమర్శలను వీహెచ్ సమర్ధిస్తోనే మరింతగా ఘాటుగా విమర్శలు గుప్పించారు. పార్టీలో సీనియర్లకు విలువ లేకుండా పోయిందని, తమ అభిప్రాయాలు తీసుకోకుండా నివేదిక ఎలా తయారు చేస్తారని మండిపడ్డారు. పిసిసి అధ్యక్షుడు, ముఖ్యమంత్రిపై నేరుగా ఒత్తిడి చేసేందుకు సిద్దమైన వీహెచ్  గాంధీభవన్ ముందు మౌన దీక్ష చేస్తున్నట్టు ప్రకటించారు. మంత్రుల కమిటీపై సీనియర్లు చేస్తోన్న విమర్శలను సీఎం వర్గీయులు తేలిగ్గా తీసుకున్నారు. తమ సొంత పనుల కోసం సీనియర్లు అప్పుడప్పుడు ఇలా ఉగ్రరూపం దాల్చుతారని వ్యాఖ్యానిస్తున్నారు.

...avnk