Posted: 07/08/2012 04:36 PM IST

      సల్మాన్ ఖాన్ సోదరుడు సొహైల్ ఖాన్ కారు కింద పడి ఓ వృద్ధురాలు దుర్మరణం పాలైంది. సరిగ్గా పదేళ్ల క్రితం సల్మాన్ సైతం పేవ్ మెంట్ మీద పడుకున్న వ్యక్తులపై కారు నడిపి ఓ వ్యక్తి మరణానికి కారణమయ్యాడు. ఆ కేసు ఇంకా సద్దుమణగక ముందే ఇప్పుడు సొహైల్ ఖాన్ ఉదంతం చోటుచేసుకోవడం సంచలనమైంది.  సరిగ్గా పదేళ్ల క్రితం బాంద్రాలో జరిగిన కారు ప్రమాదం బాలీవుడ్ కండల వీరుడు సల్మాన్ ఖాన్ ను చిక్కుల్లో పడేసింది. 2002 సెప్టెంబర్ 28న బాంద్రాలో సల్మాన్ కారు పేవ్ మెంట్ మీద ఉన్న జనంపైకి దూసుకుపోయింది. ఆదమరిచి నిదురపోతున్న ఐదుగురిపై కారు ఎక్కడంతో ఒకరు మరణించగా మరో నలుగురు గాయపడ్డారు. ఈ కేసులో సల్మాన్ ను అరెస్టు చేసి రిమాండ్ కు తరలించారు. మృతుడు నంద్ బెహ్రా కుటుంబానికి 10లక్షలు, గాయపడిన వారికి మూడు లక్షల రూపాయాలు చెల్లించాలని బాంద్రా మెట్రోపాలిటన్ మేజిస్ట్రేట్ కోర్టు సల్మాన్ ను ఆదేశించింది.
     తాజాగా సల్మాన్ ఖాన్ సోదరుడు సోహైల్ ఖాన్ కు దాదాపు ఇలాంటి అనుభవమే ఎదురైంది. బాంద్రాలోని ఓ చర్చి సమీపంలో చంద్రబాల అనే 60ఏళ్ల వృద్ధురాలిపై ఆదివారం రాత్రి లాండ్ క్రూయిజర్ కారు దూసుకుపోతుంది. వృద్ధురాలిని ఆసుపత్రికి తరలించేలోగా ఆమె కన్నుమూసింది. నటుడు సోహైల్ ఖాన్ పేరుతో ఆ కారు రిజిస్టర్ అయింది. అయితే ప్రమాద సమయంలో సోహైల్ ఖాన్ కారులో లేడని తెలియడంతో ఆయన కారు డ్రైవర్ ధనంజయ్ పై పోలీసులు కేసు నమోదు చేసి అతన్ని అరెస్టు చేశారు. మరోవైపు కారు ప్రమాదం గురించి తనకు తెలిసి షాక్ అయినట్టు సోహైల్ ఖాన్ తెలిపారు.

      తాను ఇంట్లోనే ఉండటంతో అసలు ఏమి జరిగిందో తనకు తెలియదని ఆయన చెప్పారు. డ్రైవర్ మాత్రమే కారులో ఉన్నాడని ఇంటికి తిరిగి వస్తుండగా ఈ సంఘటన జరిగినట్టు తనకు తెలిసిందని అన్నారు. ఒక మహిళ చనిపోయిందనే విషయాన్ని పట్టించుకోకుండా కారు ఎవరదనే విషయంపైనే చర్చ సాగడం విచారకరమన్నారు. ఇటు సల్మాన్ సైతం ఇది పొరపాటున జరిగిన ప్రమాదంగా పేర్కొన్నారు. రోడ్డుపై తనకు ఓ పోలిథిన్ బ్యాగ్ కనిపించిందని అయితే అది నల్లదుస్తులు ధరించిన మహిళ అని తర్వాతే తెలిసిందని డ్రైవర్ తనతో చెప్పినట్టు సల్మాన్ పేర్కొన్నారు. మృతురాలిని ఆమె కుటుంబ సభ్యులు గతంలోనే వదిలివేసినట్టు తన దృష్టికి వచ్చిందని చెప్పారు. ఎవరికీ నష్టపరిహారం చెల్లించలేదని తెలిపారు.

...avnk