Posted: 07/06/2012 06:58 PM IST

మన దేశ తొలి రాష్ట్రపతి బాబు రాజేంద్ర ప్రసాద్ గుర్తున్నారా. ఆయన మరణించి 50 సంవత్సరాలు దాటుతున్నా సరే ఇప్పటికీ ఆయన పేరు మీద బ్యాంక్ అకౌంట్ నడుస్తోందంటే నమ్ముతారా? అయితే మీరు ఒకసారి బీహార్ రాజధాని పాట్నాలో ఉన్న పంజాబ్ నేషనల్ బ్యాంక్‌కు వెళ్ళాల్సిందే. ఆ బ్యాంక్ మెట్లు ఎక్కగానే రాజేంద్ర ప్రసాద్ అకౌంట్ నంబర్, ఆయన ఫొటో, సంతకంతో కూడిన పెద్ద బోర్డు దర్శనమిస్తుంది. ప్రస్తుతం ఆయన ఖాతాలో రూ.1,813ల నగదు ఉన్నట్లు ఆ బ్యాంకు ఉన్నతాధికారి ఒకరు చెప్పారు.

ప్రస్తుతం ఈ ఖాతా వాడుకలో లేనప్పటికీ ప్రతీ ఆరు నెలలకు ఒకసారి వడ్డీని జమ చేస్తున్నట్లు ఆయన తెలిపారు. సరిగ్గా చనిపోవడానికి నాలుగు నెలల ముందు అంటే 1962, అక్టోబర్ 24న రాజేంద్రప్రసాద్ పాట్నాలోని ఎగ్జిబిషన్ రోడ్డులో ఉన్న పంజాబ్ నేషనల్ బ్యాంక్‌లో రూ.500లతో ఖాతా ప్రారంభించారు. తమ బ్యాంకులో తొలి రాష్ర్టపతి ఖాతా ఉన్నందుకు చాలా గర్వంగా భావిస్తున్నామని, అత్యంత ప్రాధాన్యత కల్గిన ఖాతాదారునిగా గుర్తింపు ఇచ్చామని ఆ బ్యాంక్ మేనేజర్ ఎస్.ఎల్.గుప్తా తెలిపారు. అందుకే ఆయన బ్యాంక్ అకౌంట్ నంబర్ 0380000100030687తో పాటు ఆయన సంతకాన్ని కూడా బ్యాంకులో ప్రముఖంగా కన్పించేలా ఏర్పాట్లు చేసినట్లు తెలిపారు. తొలి రాష్ర్టపతి ఖాతా తమ బ్యాంకులో బీహార్‌తో పాటు దేశవ్యాప్తంగా వ్యాపారాన్ని పెంచుకోవడానికి తోడ్పడుతోందన్నారు.  సహజంగా ఎవరైనా మరణించిన తర్వాత చట్టపరంగా వారసులు వస్తే ఖాతాను మూసివేసి, బ్యాలెన్స్‌ను వారికి ఇవ్వడం జరుగుతుందని, కాని ఈ అకౌంట్‌కు సంబంధించి ఇంత వరకు ఎవరు రాకపోవడంతో ఖాతాను కొనసాగిస్తున్నట్లు గుప్తా తెలిపారు. స్వాతంత్య్ర సమరయోధుడిగా గుర్తింపు పొందిన ఈ బీహారీ 1952న తొలి రాష్ట్రపతిగా ఎన్నికవడమే కాకుం డా 1962 వరకు పదేళ్ల పాటు రాష్ట్రపతిగా సేవలందించారు. 1884, డిసెంబర్3న జన్మించిన రాజేంద్ర ప్రసాద్ 1963, ఫిబ్రవరి28న కన్నుమూశారు.