Posted: 05/17/2012 05:22 PM IST

వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి తన తండ్రి అయిన దివంగత ముఖ్యమంత్రి వైయస్ రాజశేఖర రెడ్డి పేరు వాడుకొని రాజ్యాంగేతర శక్తిగా ఎదిగారని దేవాదాయ శాఖ మంత్రి సి.రామచంద్రయ్య మండిపడ్డారు. ఆయన కడప జిల్లాలో విలేకరులతో మాట్లాడారు. సంఘ విద్రోహ శక్తులతో జగన్ చేయి కలిపారని ఆరోపించారు. జగన్ సంఘ విద్రోహ శక్తిగా ఎదిగి రాష్ట్రంలో అరాచకం సృష్టిస్తున్నారన్నారు.

తన స్వార్థం కోసం నిజాయితీ అధికారులను జైళ్లకు వెళ్లేలా బలి చేశారని ఆవేదన వ్యక్తం చేశారు. జగన్ అక్రమాస్తుల వ్యవహారంలో ఇంకా చాలా మందే ఉన్నారని ఆయన అనుమానం వ్యక్తం చేశారు. జగన్ ఇప్పటికైనా తాను చేసిన అక్రమాలపై ఆత్మ విమర్శ చేసుకోవాలని సూచించారు. తన తప్పు ఒప్పుకొని అప్రావర్‌గా మారాలని అన్నారు.

ఇలాంటి అకృత్యాలన్నీ చేస్తూనే దేవుడు ఉన్నాడని జగన్ చెప్పడం హాస్యాస్పదం'' అని మండిపడ్డారు. కనీసం ఆయన చెప్పే దేవుడైనా జగన్‌ను సమర్థిస్తాడా అని ప్రశ్నించారు. చేసేవన్నీ చేసి ‘స్వాతిముత్యం’లో కమల్‌హాసన్‌లాగా నటించాలనుకుంటే సరిపోదన్నారు. "నీ వల్ల ఎంత మంది జైలు పాలవుతున్నారో చూస్తున్నావా? కాంగ్రెస్ పార్టీ, కార్యకర్తలు, అధిష్ఠానం నీ కుటుంబాన్ని అంతగా ఆదరిస్తే ఆ పార్టీనే భ్రష్టుపట్టించాలని చూస్తున్నావు. ఇప్పటికైనా అప్రూవర్‌గా మారి పాపాలు ఒప్పుకోవాలని సూచించారు.