Posted: 02/22/2012 05:27 PM IST

జూనియర్ ఎన్టీఆర్ సినిమాల వేగం పెంచాడు. ఈ సంవత్సరం మూడు సినిమాల్లో నటిస్తున్నాడు. బోయపాటి శ్రీను దర్శకత్వంలో రూపొందుతున్న ‘దమ్ము’ చిత్రీకరణ తుదిదశలో వుంది. ఈ చిత్రం తర్వాత శ్రీనువైట్ల దర్శకత్వంలో ఎన్టీఆర్ నటించనున్న విషయం తెలిసిందే. ‘దూకుడు’ చిత్రానికి పనిచేసిన రచయితలు కోన వెంకట్, గోపీ మోహన్, సంగీత దర్శకుడు తమన్ టీమ్ అంతా ఈ చిత్రానికి పనిచేస్తోంది. ఈ సినిమాకు సంబంధించిన స్క్రిప్ట్ వర్క్ దాదాపు పూర్తి కావొచ్చినట్లు సమాచారం. తొలుత ఈ చిత్రానికి ‘యాక్షన్’ అనే టైటిల్‌ను ఖరారు చేసినట్లు వార్తలొచ్చాయి.

తాజా సమాచారం ప్రకారం ఈ చిత్రానికి ‘బాద్షా’ అనే టైటిల్‌ను పరిశీలిస్తున్నట్లు తెలిసింది. పరమేశ్వర ఆర్ట్స్ పతాకంపై బండ్ల గణేష్‌బాబు ఈ చిత్రాన్ని నిర్మించనున్నాడు. కాజల్ అగర్వాల్ కథానాయిక. ఎన్టీఆర్‌ను సరికొత్తగా ఆవిష్కరిస్తూ క్లాస్, మాస్ అంశాల మేళవింపుతో దర్శకుడు శ్రీనువైట్ల ఈ చిత్రాన్ని తీర్చిదిద్దబోతున్నట్లు తెలుస్తోంది. ఈ చిత్రానికి సంబంధించిన రెగ్యులర్ షూటింగ్ ఏప్రిల్ మొదటి వారంలో ప్రారంభం కానున్నట్లు సమాచారం. ఈ సినిమా తర్వాత పూరి జగన్నాథ్ దర్శకత్వంలో ఎన్టీఆర్ ఓ చిత్రం చేయనున్నాడు. సెప్టెంబర్‌లో ఈ చిత్రం సెట్స్ మీదకు వెళ్లనుంది. విశ్వసనీయ సమాచారం ప్రకారం హరీష్‌శంకర్ దర్శకత్వంలో కూడా ఎన్టీఆర్ ఓ సినిమా చేసే సన్నాహాల్లో వున్నట్లు తెలిసింది.