Posted: 02/19/2012 04:51 PM IST

ఒక పక్క తమిళనాడు ముఖ్యమంత్రి జయలలిత ఇన్నాళ్ళ శశికళ చెలిమిని మర్చిపోయి స్నేహ బంధాన్ని కర్కశంగా తెంచేస్తూ శశికళని సకుటుంబ సపరివార సమేతంగా పార్టీలోంచే బయటకు పంపించెయ్యటమే కాకుండా కొసరుగా ఆమె సోదరుడు, తాజాగా ఆమె భర్తనూ జైలు పాలు చేస్తుంటే, శశికళ మాత్రం తన అనురాగాన్నీ విశ్వాసాన్నీ చూపిస్తూ, కర్నాటక కోర్టులో జయలలితకు అనుకూలమైన సాక్ష్యాన్నివ్వటం చెలియ మీది ఆమె అనురాగానికి సాక్ష్యమా లేక ఉతృష్టమైన రాజకీయ ఎత్తుగడకు ప్రతిబింబమా అన్నది అర్థం కాక చాలామంది రాజకీయ విశ్లేషకులు కొట్టుమిట్టాడుతున్నారు.

జయ లలిత జయ టివి లో భాగస్వామే కానీ నిద్రాణ భాగస్వామట. శశికళే జయ టివికి సారధ్యం వహించి అన్ని నిర్ణయాలు, లావాదేవీలు, కీలక వ్యవహారాలను కూడా చక్కబెడుతుండేవారట. ఈ విధంగా కర్నాటకలో జయలలిత స్టేట్ మెంటునివ్వగా, నిన్న కోర్టుకి హాజరైన శశికళ కూడా అదే విధంగా స్టేట్ మెంటు నివ్వటం రాజకీయరంగంలో అందరికీ ఆశ్చర్యం కలిగిస్తోంది.

శశికళ తనకు అనుకూలంగా సాక్ష్యమివ్వటం కోసమే జయలలిత శశికళ భర్త నటరాజన్ ని అరెస్ట్ చేయించటం ద్వారా తన ఆధీనంలోకి తీసుకుని శశికలను బ్లాక్ మెయిల్ చేస్తోందని కొందరు భావిస్తుంటే, అందరూ కలిసి ఆడుతున్న నాటకమే నని, అంతా సద్దు మణిగిన తర్వాత ఎలా బయటకు పోయారో అలాగే మళ్ళీ లోపలకు చేరుకుంటారని కొందరు అంటున్నారు. జయ, శశికళ ల స్నేహాన్ని నటరాజన్ అతిగా వాడుకున్నందుకు అతనికి తగిన శాస్తి జరిగిందని కొందరంటుంటే, తనవాళ్ళని పెట్టుకునేదే వాళ్ళకి సంపాదించుకునే అవకాశమివ్వటం కోసమే కదా, కానీ అవి అవసరమైనప్పుడు అధికారంలో ఉన్నవాళ్ళకి చేతిలో ఆయుధాలు కూడా అవుతుంటాయని మరికొందరంటున్నారు.

ఏది ఏమైనా తమిళనాడు రాజకీయాలే సెపరేట్

-శ్రీజ