Posted: 12/15/2011 04:54 PM IST

‘‘అడవిలో బాబు దూకుడు’’ అనే ఈ టైటిల్ ని చూసి ప్రిన్స్ మహేష్ బాబు తాజాగా తీస్తున్న చిత్రం షూటింగ్ అడవిలో దూకుడుగా జరుపుకుంటుందని అనుకుంటే అది మీ పొరపాటు. బాబు అంటే చంద్రబాబు. ఈయన అడవిలో దూకుడు ఏంటనేగా మీ సందేహం.? అదేం లేదండి... తెలంగాణలో పర్యటిస్తే అడ్డుకుంటామని జాక్‌ ప్రకటించిన నేపథ్యంలో బుధవారం టీడీపీ అధినేత చంద్రబాబునాయుడు ఆదిలాబాద్‌ పర్యటనకు అనూహ్యంగా స్పందన లభించడం ఆ పార్టీ శ్రేణుల్లో ఉత్సాహం కలిగించింది. దీంతో బాబు పాదయాత్ర దూకుడుగా సాగింది.

బాబు పర్యటనను అడ్డుకోవాలని జాక్‌ చైర్మన్‌ కోదండరామిరెడ్డి పిలుపు ఇవ్వడం, ఆయన పిలుపునకు స్పందించి.. ఆ మేరకు ఏర్పాట్లలో ఉన్న టీఆర్‌ఎస్‌-జాక్‌ కార్యకర్తలను పోలీసులు ముందస్తుగా అరెస్టు చేయటంతో ఉద్రిక్త పరిస్థితి నెలకొనే ప్రమాదం ఉందని అంచనా వేశారు. ఫలితంగా జనం రారని తెలంగాణ నేతలు భయపడ్డారు. కానీ బుధవారం నాటి పాదయాత్ర, బహిరంగసభ కు నాయకులు కూడా ఊహిం చని స్థాయిలో విజ యం సాధించడంతో ఊపిరి పీల్చుకున్నారు.

ఇప్పటి వరకూ తెలంగాణలో బాబు పాదయాత్ర-బహిరం గసభల్లో నల్లగొండ సూర్యాపేట ఒక్కటే హైలెట్‌గా నిలిచింది. అయితే తాజాగా ఆదిలాబాద్‌లో దాదాపు 40 వేల మంది వరకూ తరలిరావడం స్వయంగా నాయక త్వాన్నే ఆశ్చర్యపరిచింది.దీనితో తెలంగాణలో భవిష్యత్‌ పరిస్థితిని అంచనా వేసిన నాయకత్వం.. ఈనెలలోనే కరీంనగర్‌, వరంగల్‌ జిల్లాల్లో కూడా పాదయాత్ర చేయాలని నిర్ణయించింది. తెలంగాణ ఉద్యమ తీవ్రత ఎక్కువగా ఉన్న ఈ రెండు జిల్లాల్లో కూడా పాదయాత్ర విజయవంతం అవుతే, ఇక తెలంగాణలో పార్టీని పూర్తి స్ధాయిలో పునర్నిర్మాణం చేసే అంశంపై దృష్టి సారించవచ్చని బాబు భావిస్తున్నాడట. ఈ సభ విజయంతో బాబు దూకుడుగా యాత్రలు చేపట్టబోతున్నాడని అనుకుంటున్నారు.