ఊరమాస్ గా అల్లు అర్జున్.. పుష్ప రిలీజ్ డేట్ లాక్

Posted: 01/28/2021 07:44 PM IST

టాలీవుడ్ స్టైలిష్ స్టార్ అల్లు అర్జున్‌ - విభిన్న కథాంశాలతో ప్రయోగాత్మక చిత్రాలను రూపోందించే ప్రముఖ దర్శకుడు సుకుమార్‌ హ్యాట్రిక్‌ కాంబినేషన్లో తెరకెక్కుతున్న చిత్రం ‘పుష్ప’. ఎర్రచందనం స్మగ్లింగ్‌ కథాంశంతో రూపుదిద్దుకుంటోన్న ఈ సినిమాలో స్టైలిష్ స్టార్ అల్లు అర్జున్ విభిన్నంగా కనిపించనున్నారు. ఆర్ఆర్ఆర్ చిత్రం రిలీజ్‌ డేట్ ను విడుదల చేసిన నాటి నుంచి ఒక్కో చిత్ర యూనిట్ తమ చిత్రాల విడుదలకు డేట్ ఫిక్స్ చేసుకుంటున్నాయి, ఈ క్రమంలోనే ఫుష్ప చిత్రబృందం కూడా చిత్ర విడుదలకు ముహూర్తాన్ని లాక్ చేసింది.

స్వాతంత్ర దినోత్సవాన్ని పురస్కరించుకుని ఈ ఏడాది ఆగస్టు 13న ‘పుష్ప’ చిత్రాన్ని ప్రేక్షకుల ముందుకు తీసుకురానున్నట్లు చిత్రబృందం తెలియజేసింది. ఈ విషయాన్ని అల్లు అర్జున్ తన సోషల్ మీడియా అకౌంట్ ద్వారా వెల్లడించారు. తన ట్విటర్‌ ఖాతాలో ఈ మేరకు పోస్టు పెట్టిన బన్ని.. ‘పుష్ప’ స్పెషల్‌ పోస్టర్‌ను అభిమానులతో పంచుకున్నారు. ఇందులో బన్నీ స్మగ్లర్ల టీంకు నాయకుడిగా ఊరమాస్‌ గెటప్‌లో కనిపించారు. ఈ సందర్భంగా ‘2021 ఆగస్టు 13వ తేదీన ‘పుష్ప’ థియేటర్లలో విడుదల కానుందని పేర్కోన్నారు.

ఈ ఏడాది థియేటర్లలో మీ అందరినీ కలవడం కోసం నేను ఎంతో ఆతృతతో ఎదురుచూస్తున్నాను. నేను, సుకుమార్‌, దేవిశ్రీప్రసాద్‌లు  మరోసారి చరిత్ర పునరావృతం చేస్తామని ఆశిస్తున్నాను’ అని బన్నీ ట్వీట్‌ చేశారు. పాన్ ఇండియన్‌ మూవీగా తెరకెక్కుతున్న ఈ సినిమాలో బన్నీకి జంటగా రష్మిక సందడి చేయనున్నారు. సుమారు వంద కోట్ల రూపాయల భారీ బడ్జెట్‌తో నిర్మితమవుతోన్న ఈ చిత్రాన్ని  మైత్రీమూవీ మేకర్స్‌ బ్యానర్‌పై నిర్మిస్తున్నారు. దేవిశ్రీప్రసాద్‌ స్వరాలు అందిస్తున్నారు. ప్రస్తుతం ఈ సినిమా షూట్‌ తెలుగు రాష్ట్రాల్లోని అటవీ ప్రాంతాల్లో శరవేగంగా జరుగుతోంది.