ఆరోగ్యంగానే వున్నా.. విశ్రాంతి తీసుకుంటున్నా.. సుద్దాల

Posted: 07/12/2020 07:36 AM IST

Suddala ashok teja refutes rumours about his health

తెలుగు సినీపరిశ్రమలో మెరిసిన అతికొద్ది మంది ఆణిముత్యాలలో ప్రముఖ గేయ రచయిత సుద్దాల అశోక్‌ తేజ అగ్రభాగన వున్నారు. గత కొంత కాలం క్రితం అనారోగ్య సమస్యలతో బాధపడిన ఆయన మే నెల చివరి వారంలో అందుకు గాను శస్త్రచికిత్స కూడా చేయించుకున్నారు, కాలేయ సమస్యతో బాధపడుతున్న ఆయనకు తన కుమారుడు అర్జన్ కాలేయ భాగాన్ని అందించడంతో తేజకు కాలేయ మార్పిడి చేశారు హైదరాబాద్ లోని ప్రైవేటు అసుపత్రి వైద్యులు. అయితే శస్త్రచికిత్స అనంతరం ఆయన కొన్న రోజుల పాటు అసుపత్రిలో వైద్యుల పరిశీలనతో వున్నారు.

ఆ తరువాత డిశ్చార్జ్ అయిన ఆయన తన ఇంట్లోనే విశ్రాంతి తీసుకుంటూ అనారోగ్యం నుంచి క్రమంగా కోలుకుంటున్నారు. తన కుటుంబసభ్యుల పర్యవేక్షణలో వైద్యుల సూచనలను పాటిస్తూ, వారిచ్చిన మెడికేషన్ ను పాటిస్తున్నారు, ఇప్పటికే ఆయన దాదాపుగా కోలుకున్నారు. అయితే, ఒక్కసారిగా ఆయన ఆరోగ్యంపై వదంతులు వ్యాపించాయి. ఆయనకు జరిగిన శస్త్రచికిత్స తిరగబెట్టిందని, ఆయన పరిస్థితి విషమంగా మారిందని కూడా ఓ వర్గం మీడియాతో పాటు కొన్ని వెబ్ సైట్లు కూడా వార్తలను ప్రచురించాయి, దీంతో ఆయన తాజాగా ఓ వీడియో సందేశాన్ని విడుదల చేశారు.

‘‘నేను బాగానే ఉన్నా. శస్త్రచికిత్స జరిగి 47 రోజులైంది. నా ఆరోగ్యం రోజురోజుకూ మెరుగుపడుతోంది. నా ఆరోగ్యం బాగానే ఉంది. నేను సంతోషంగా ఉన్నా. నా గురించి వస్తున్న వదంతులేవీ నమ్మొద్దు. నా ఆరోగ్యం పట్ల ఎవరికైనా స్పష్టత కావాలంటే నేరుగా నాకే ఫోన్‌ చేయండి’’ అంటూ తన శ్రేయోభిలాషులను ఉద్దేశించి ఆయన ఓ శనివారం ఓ వీడియో సందేశం విడుదల చేశారు. శస్త్ర చికిత్స జరగకముందు నుంచీ సుద్దాల అశోక్‌ తేజ గురించి వదంతులు సోషల్‌మీడియాతో చక్కర్లు కొడుతున్నాయి. అప్పట్లో నటుడు ఉత్తేజ్‌ ఈ విషయమై స్పష్టతనిచ్చారు. ఆస్పత్రి నుంచి కోలుకుని వచ్చిన తర్వాత సుద్దాల తేజ కూడా ఇది వరకే ఓ వీడియో సందేశం విడుదల చేశారు. ఇప్పుడు మరోసారి వదంతులపై స్పందిస్తూ వీడియో విడుదల చేశారు.