హీరో విజయ్ ఇంటికి బాంబ్ బెదిరింపు.. పోలీసుల తనిఖీలు..

Posted: 10/29/2019 12:54 PM IST

Bomb threat for thalapathy vijay s house

ప్రముఖ తమిళ నటుడు దళపతి విజయ్‌ ఇంటి చుట్టూ చెన్నై పోలీసులు భారీగా పోలీసులను నియమించారు. శనివారం రాత్రి చెన్నై కంట్రోల్ రూంకు ఫోన్ కాల్ వచ్చింది. విజయ్ ఇంట్లో బాంబ్ పెట్టామని ఓ గుర్తుతెలియని వ్యక్తి ఫోన్ చేశాడు. అది ఏ క్షణానైనా పేలొచ్చని బెదిరించాడు. దాంతో పోలీసులు హుటాహుటిన విజయ్ ఇంటికి చేరుకున్నారు. చెన్నైలోని పనైయూర్ ప్రాంతంలో విజయ్ నివసిస్తున్నాడు. వెంటనే పోలీసులు అక్కడి చేరుకుని ఇల్లంతా తనిఖీలు చేశారు. అయితే బాంబ్ మాత్రం దొరకలేదు. ఎందుకైనా మంచిదని ఆయన ఇంటి చుట్టూ భారీగా భద్రత ఏర్పాటుచేశారు.

అనంతరం విజయ్ తండ్రి ప్రముఖ నిర్మాత చంద్రశేఖర్ నివాసానికి కూడా పోలీసులు వెళ్లారు. అక్కడ కూడా తనిఖీలు చేశారు. అక్కడా బాంబ్ దొరకలేదు. ఫోన్ కాల్‌ను ట్రేస్ చేసిన పోలీసులు అళపాక్కమ్ ప్రాంతంలోని పోరూర్ సమీపం నుంచి ఆ ఫోన్ కాల్ వచ్చినట్లు పోలీసులు గుర్తించారు. ఫోన్ చేసిన కుర్రాడిని అదుపులోకి తీసుకున్నారు. ఇలా ఎందుకు చేశావ్ అని పోలీసులు ప్రశ్నించగా పొంతన లేని సమాధానాలు చెప్పి వారిని అయోమయానికి గురిచేస్తున్నాడు. మరో మూడు రోజుల్లో అసలు విషయం బయటపెట్టకపోతే పోలీసులు తమదైన శైలిలో విచారణ మొదలుపెడతారు.

ఇకపోతే విజయ్ నటించిన ‘బిజిల్’ సినిమా ఇటీవల విడుదలై బ్లాక్ బస్టర్ విజయం సాధించింది. అట్లీ దర్శకత్వం వహించిన ఈ సినిమా తెలుగులో ‘విజిల్’ టైటిల్‌తో విడుదలైంది. నయనతార ఇందులో విజయ్‌కు జోడీగా నటించారు. ఏఆర్ రెహమాన్ సంగీతం అందించారు. ఇప్పటికే ఈ సినిమా రూ.100 కోట్ల క్లబ్‌లో చేరినట్లు తెలుస్తోంది. బాలీవుడ్ నటుడు షారుక్ ఖాన్ నటించిన ‘చక్ దే ఇండియా’ కాన్సెప్ట్‌తో ఈ సినిమాను తెరకెక్కించారు అట్లీ. చక్ దే ఇండియా హాకీ క్రీడకు సంబంధించిన సినిమా. విజిల్ ఫుల్‌బాల్ క్రీడకు సంబంధించిన సినిమా. పూర్తిగా కాపీ కొట్టకుండా అట్లీ తనదైన క్రియేటివిటీని జోడించి ఈ సినిమాను తీశారు. విజయ్ అభిమానులకు అసలైన దీపావళి కానుకనిచ్చారు. విజయ్ కెరీర్‌లోనే ఈ సినిమా ఓ ల్యాండ్‌మార్క్‌గా నిలిచిపోయింది.