‘ఎన్టీఆర్’ దర్శకత్వ బాధ్యతలు ఆయనకేనా.?

Posted: 04/25/2018 09:45 PM IST

నట సార్వభౌముడు, స్వర్గీయ ముఖ్యమంత్రి, పేదల పెన్నిధి నందమూరి తారక రామారావు జీవిత చరిత్ర ఆధారంగా తెరకెక్కిస్తున్న ‘ఎన్టీఆర్‌’ సినిమా నుంచి దర్శకుడు తేజ వైదొలిగారు. ఎన్టీఆర్ కు వీరాభిమానిగా వున్న తాను ఈ చిత్రానికి న్యాయం చేయలేనని పేర్కొంటూ ఆయన ఈ చిత్రం నుంచి వైదోలిగినట్లు పేర్కొన్నాడు. అయితే ఇప్పుడు ఈ చిత్రానికి దర్శకత్వం బాధ్యతను ఎవరు చేపడతారా.? అని చర్చకు దారితీస్తుంది.

బాలకృష్ణ తన తండ్రి పాత్రలో నటిస్తున్న ఈ చిత్రాన్ని ఆయనే సొంతంగా బ్రహ్మతేజ ప్రోడక్షన్ పేరుతో సంస్థను ఏర్పాటు చేసి మరీ నిర్మిస్తున్న విషయం తెలిసిందే. ఇటీవల రామకృష్ణ స్టూడియోలో సినిమా షూటింగ్‌ ప్రారంభమైన ఈ చిత్ర రూపోందించే బాద్యతలు దర్శకేంద్రుడు రాఘవేంద్రరావుకు అప్పగించే అవకాశాలు వున్నట్లు తెలుస్తుంది. ఎన్టీఆర్‌ అనేక మంది సినీ తారలతో కలిసి వెండితెరను పంచుకున్నారు.

ఈ నేపథ్యంలో ఆయా పాత్రల్లో ఎవరు నటిస్తున్నారనే విషయంపై ఆసక్తి నెలకొంది. ఇంకా నటీనటుల ఎంపిక ప్రక్రియ పూర్తి కానట్లు తెలుస్తోంది. ఈ సినిమాలో ఎన్టీఆర్‌ సతీమణి బసవతారకం పాత్ర కోసం బాలీవుడ్‌ నటి విద్యా బాలన్‌ను నిర్మాతలు సంప్రదించినట్లు సమాచారం. అయితే ఆమె ఒప్పుకున్నారో.. లేదో తెలియాల్సి ఉంది. జయలలిత పాత్రలో కాజల్‌ నటిస్తున్నారని వార్తలు వచ్చాయి. వీటిపై కాజల్‌ స్పందిస్తూ.. తను నటించడం లేదని స్పష్టం చేశారు.