నానితో సినిమా చేస్తున్నా : నాగ్

Posted: 10/03/2017 03:53 PM IST

టాలీవుడ్ లో మళ్లీ మల్టీస్టారర్ చిత్రాలకు పాత రోజులు వచ్చేసినట్లే. అగ్ర హీరోల దగ్గరి నుంచి చిన్న చితకా హీరోల దాకా ఈ మధ్య వరుసబెట్టి కలిసి నటించేస్తున్నారు. ఈ క్రమంలో ఇగోలు, స్టార్ డమ్ లు లాంటివి పట్టించుకోకుండా కథాబలంతోనే సినిమాలను ఒప్పేసుకుంటున్నారు.

గత కొద్ది రోజులుగా టాలీవుడ్ లో వినిపిస్తున్న ఓ క్రేజీ మల్టీస్టారర్ మూవీ ఇప్పుడు ఖరారైంది. ఓ బిగ్ బ్యానర్ పై ఓ మల్టీస్టారర్ సినిమా తెరకెక్కనున్నట్టు కొన్ని రోజులుగా వార్తలు షికారు చేస్తున్నాయి. 'భలే మంచిరోజు' .. 'శమంతకమణి' సినిమాల దర్శకుడు శ్రీరామ్ ఆదిత్య దర్శకత్వం వహించనున్న ఈ సినిమాలో నాగార్జున .. నాని కలిసి నటిస్తున్నట్టుగా చెప్పుకుంటున్నారు. ఇది వాస్తవమేనని తాజాగా నాగార్జున స్పష్టం చేశారు.

వైజయంతీ మూవీస్ బ్యానర్ పై తాను మల్టీస్టారర్ మూవీ చేయనుండటం నిజమేనని అన్నారు. పైగా ఈ సినిమాలో నాని పాత్ర ఎంతో సరదాగా సాగిపోతుందని, తన పాత్ర కూడా ఎంతో ఇంట్రెస్టింగ్ గా ఉంటుందని అన్నారు. అభిమానులందరినీ ఆకట్టుకునేలా ఈ సినిమా ఉంటుందని చెప్పారు. 2018 ఫిబ్రవరి కల్లా షూటింగ్ అయిపోయి సినిమా సమ్మర్ లోనే రిలీజ్ అవుతుందని హింట్ కూడా ఇచ్చేశాడు. ప్రస్తుతం నాగ్ నటించిన రాజు గారి గది 2 రిలీజ్ కు రెడీ అవుతుండగా.. నాని ఎంసీఏ, కృష్ణార్జున యుద్ధం షూటింగ్ లతో బిజీగా ఉన్నాడు.