విశాల్ విక్టరీ.. తమిళ్ రాకర్స్ అడ్మిన్ అరెస్ట్

Posted: 09/13/2017 01:29 PM IST

తమిళ సినిమాల్లో కొన్నేళ్లుగా సమూల మార్పులు చోటు చేసుకుంటున్నాయి. కోట్లకు కోట్లు బడ్జెట్ పెట్టేందుకు నిర్మాతలు ధైర్యం చేసి ముందుకు వస్తున్నారు. అయితే మిగతా భాషల్లో కంట్రోల్ చేయగలుగుతున్నప్పటికీ.. పైరసీ భూతం కోలీవుడ్ ను దారుణంగా దెబ్బేస్తూ వస్తోంది. రజనీకాంత్, విజయ్, సూర్య.. ఇలా ఎవరి చిత్రాన్ని వదలకుండా రిలీజ్ అయిన రోజే లీక్ చేసి పడేస్తున్నారు.

ముఖ్యంగా ఏ సినిమా అయినా, రిలీజ్ అయిన రోజే పైరసీ చేయడంలో దిట్టయిన 'తమిళ్ రాకర్స్' వ్యవహారం మరీ తలనొప్పిగా మారింది. దీనిపై తాను నడిఘర్ సంఘ కార్యదర్శి బాధ్యతలు చేపట్టినప్పటి నుంచి నటుడు విశాల్ హెచ్చరిస్తూ వస్తూనే ఉన్నాడు. అయినప్పటికీ వెబ్ సైట్ నిర్వాహకులు మాత్రం అస్సలు వెనక్కి తగ్గటం లేదు. ఛాలెంజ్ చేసి మరీ కొత్త సినిమాలను లీక్ చేసి పడేశారు. నిర్మాతల సంఘం, నడిఘర్ ప్రయత్నించినా వారిని అడ్డుకోలేకపోయారు.  ఈ నేపథ్యంలో ఎట్టకేలకు చెన్నై పోలీసులు తమిళ్ రాకర్స్ నిర్వాహకులను కటకటాల వెనక్కు పంపించారు.

'తమిళ్ రాకర్స్' వెబ్ సైట్ అడ్మిన్ గౌరీ శంకర్ ను అరెస్ట్ చేశామని పోలీసులు తెలిపారు. ఇతను మూడో కీలక నిందితుడని, మిగతా వారిని త్వరలో అరెస్ట్ చేస్తామని తెలిపారు. అయితే అందరినీ అరెస్ట్ చేసిన తరువాత మాత్రమే వెబ్ సైట్ ను పూర్తిగా మూసివేయగలమని పోలీసులు వెల్లడించారు.