స్మోకింగ్ మానలేకపోతున్నా.. రేపిస్ట్ తో అస్సలు మాట్లాడలేదు: సంజయ్ దత్

Posted: 09/07/2017 06:43 PM IST

సినిమాలో ఏదో ఫార్మాలిటీగా స్మోకింగ్ అండ్ డ్రింకింగ్ హెచ్చరికలు జారీ చేసే బాలీవుడ్ స్టార్లు.. రియల్ లైఫ్ లో మాత్రం ఆ అలవాట్లను అస్సలు మానుకోలేకపోతున్నారు. బాలీవుడ్ లో అయితే ఓపెన్ గానే దొరికిన వాళ్లు ఎందరో.. షారూఖ్ దగ్గరి నుంచి నేటి కుర్ర హీరోల దాకా పబ్లిక్ పొగరాయుళ్ల జాబితాలోనే ఉన్నారు. అయితే సీనియర్ నటుడు సంజయ్ దత్ మాత్రం ఆ అలవాటును ఏదో ఒక రోజు మానేసి తీరతానంటున్నాడు.

చిన్నప్పుడు జరిగిన ఓ ఘటనను ఈ సందర్భంగా ఆయన గుర్తు చేసుకుంటున్నాడు కూడా. సిగరెట్ తాగుతూ తన తండ్రి సునీల్ దత్ కి దొరికిపోయిన ఓ సంఘటనను బాలీవుడ్ నటుడు సంజయ్ దత్ గుర్తుచేసుకున్నారు. ఓ కార్యక్రమంలో పాల్గొన్న సంజయ్ దత్ చేతిలో సిగరెట్ కనబడటంతో మీడియా ప్రశ్నించగా ఆ సంఘటన గురించి చెబుతూ, ‘ఓ సారి బాత్రూమ్ లో సిగరెట్ తాగుతూ నాన్నకు దొరికిపోయా. అంతే, వెంటనే నన్ను బయటకి ఈడ్చుకెళ్లి చావగొట్టారు’ అని చెప్పాడు.

అయినా సిగరెట్ మానటం తన వల్ల కావడం లేదని, ఏదో రోజు ఈ అలవాటు నుంచి బయటపడతాననే నమ్మకం ఉందని సంజయ్ ధీమా వ్యక్తం చేశాడు. కాగా, ప్రస్తుతం ‘భూమి’ సినిమాలో సంజయ్ దత్ నటించాడు. సినిమా రిలీజ్ కు రెడీ అయింది. జైల్లో ఉన్న సమయంలో ఓ రేపిస్ట్ తన రూంలో ఉండేవాడని, ఇంట్లో మహిళల విలువ నాకు తెలుసు కాబట్టి అతగాడితో ఏనాడూ మాట్లాడేవాడిని కాదని మున్నాభాయ్ చెప్పుకొచ్చాడు. మహిళలను దేవతలతో సమానంగా చూస్తారు. అలాంటి, ఓ మహిళ జీవితం ఆధారంగా తెరకెక్కిస్తున్న ఈ సినిమా(భూమి)లో నటించే అవకాశాన్ని నేనెలా వదులుకుంటాను? అంటున్నాడు ఈ సీనియర్ నటుడు.