బాలీవుడ్ ఐటెం నటికి లైంగిక వేధింపులు

Posted: 08/01/2017 11:45 AM IST

సినిమాలో పని చేసే నటీమణులను తేడాగా చూసే ధోరణి మారే పరిస్థితులు ఇప్పట్లో కనిపించటం లేదు. సెలబ్రిటీలు అయినంత మాత్రానా తమకేం కొమ్ములు లేవని, సాధారణ ప్రజల్లాగే తాము లైంగిక వేధింపులకు ఎదురయిన బాపతేనని సోనమ్ లాంటి హీరోయిన్లు తమకు జరిగిన అనుభవాలను ఓపెన్ గా షేర్ చేసుకున్న దాఖలాలు ఉన్నాయి. ఈ లిస్ట్ లో ఇప్పుడు బాలీవుడ్ నటి కోయినా మిత్రా కూడా చేరిపోయింది.

రోడ్, హే బేబీ, ముసాఫిర్, ఏక్ హసీనా ఏక్ ఖిలాడీ తదితర చిత్రాలతో పాటు, పలు చిత్రాల్లో మిత్రా ఐటం సాంగ్స్ చేసింది. ఒకానొక టైంలో అటు బాలీవుడ్ ఇటు సౌత్ లోనూ ఐటమ్ సాంగ్స్ తో తెగ ఊపేసింది. లెస్బియన్ టైప్ ఆఫ్ మూవీలో నటించి సెన్సేషన్ గా మారింది కూడా. అయితే పోటీ ప్రపంచంలో అవకాశాలు లేక ఇప్పుడు చిన్న చిన్న క్యారెక్టర్లు నటిస్తూ వస్తోంది. రీసెంట్ గా తనకు లైంగిక వేధింపులు ఎక్కువ అయ్యాయంటూ పోలీస్ కేసు నమోదు చేసింది.

వారం నుంచి ఓ గుర్తు తెలియని వ్యక్తి తనకు ఫోన్ చేసి వేధిస్తున్నాడని ముంబై పోలీసులకు ఫిర్యాదు చేసింది. సుమారు 50 ఫోన్ నంబర్ల నుంచి తనకు కాల్స్ వచ్చాయని, అయితే తొలుత కాల్స్ ను పట్టించుకోలేదని ఆమె తెలిపింది. చివరకు రెచ్చిపోయిన అవతలి వ్యక్తులు.. రాత్రికి వస్తావా? డబ్బులిస్తాను... అని నీచంగా మాట్లాడుతున్నారని వాపోయింది. నటి ఫిర్యాదుపై స్పందించిన పోలీసులు ఐపీసీ సెక్షన్ 509 కింద కేసు నమోదు చేసి, నిందితులను పట్టుకునే పనిలో ఉన్నట్లు చెబుతున్నారు.