బిగ్ బాస్ షో.. రైటర్ ను లేపేశారా?

Posted: 07/27/2017 11:15 AM IST

తెలుగులో అద్భుతాలు చేస్తుందనుకున్న బిగ్ బాస్ షో కూడా చప్పగానే సాగుతోంది. అయితే కేవలం వీకెండ్ లలో మాత్రం షో టీఆర్పీ విపరీతంగా పెరిగిపోతుంది. అందుకు కారణం ఎన్టీఆర్ అందిస్తున్న హోస్టింగ్ అని ప్రత్యేకంగా చెప్పాల్సిన అవసరం లేదు. అయితే ఆ మ్యాజిక్ వరకు బాగానే ఉన్నప్పటికీ షో కి రావాల్సిన సహజత్వం మాత్రం ఎందుకనో మిస్సవుతూ వస్తోంది. అందుకు కారణం ఎన్టీఆర్ పలికే డైలాగులే...

నిజానికి ఈ షో కోసం నిర్వాహకులు ప్రత్యేకంగా ఓ డైలాగ్ రైటర్ ను అపాయింట్ చేశారు. హౌజ్ లో అప్పటిదాకా జరిగే పరిణామాలను ఆధారంగా చేసుకుని అతగాడు సంభాషణలు రాస్తుంటాడు. అంటే ఎవరో రాసిన డైలాగులను ఎన్టీఆర్ వాటినే తెరపై పలికించేస్తున్నాడన్న మాట. సహజంగా ఇలాంటి షోలకు అప్పటికప్పుడు చెప్పే డైలాగులు అయితేనే బావుంటాయి. అందుకే బేస్డ్ టోన్ ఉన్న ఎన్టీఆర్ బిగ్ బాస్ డైలాగులు జనాల్లో అంత బలమైన ముద్ర వేయలేకపోతున్నాయి. ఈ విషయంలో ఎన్టీఆర్ కూడా తీవ్ర అసంతృప్తితోనే ఉన్నాడని, అందుకే నిర్వాహకులకు నచ్చజెప్పి ఓ నిర్ణయం తీసుకున్నాడని చెబుతున్నారు.

రైటర్ ను కేవలం హౌజ్ లో జరిగే విషయాలను వివరించేందుకు మాత్రమే పరిమితం చేసి, తన వరకు డైలాగులను సొంతంగా ఆన్ ది స్పాట్ లోనే చెప్పాలని డిసైడ్ అయ్యాడంట. తద్వారా సౌకర్యంగా ఉండటమే కాదు.. జనాల్లో కూడా ఇది ఓ రియాల్టీ షో అనే ఫీలింగ్ వస్తుందన్న భావనలో జూనియర్ ఉన్నాడు. అసలే మాంచి టైమింగ్ తో పంచులేసే తారక్ కి స్వేచ్ఛ దొరికితే ఎలా చెలరేగిపోతాడో చూడాలి.