మహేష్-వంశీ సినిమాకు కొత్త కష్టాలు

Posted: 12/30/2016 11:00 AM IST

Pvp complaint on vamsi in producer council

ఆర్థిక అవాంతరాలు టాలీవుడ్ లో పెద్ద సినిమాలపై కూడా పెను ప్రభావం చూపుతున్నాయి. చేసుకున్న ఒప్పందాలను బ్రేక్ చేయటం, వారిపై ఫిర్యాదుల దాకా వెళ్లిపోవటం ఈ మధ్య చాలా ఎక్కువైంది. ఊపిరి సినిమా సమయంలో శృతీహాసన్ వ్యవహారం గుర్తుండే ఉంటుంది. డేట్లు అడ్జస్ట్ కాకపోవటంతో తప్పుకోవటం, అడ్వాన్స్ విషయంలో వివాదం రేగటంతో నిర్మాతల మండలి దాకా వెళ్లింది. చివరకు పరిస్థితి సద్దుమణగటం, తమన్నా రీప్లేస్ కావటం తెలిసిందే. నాన్నకు ప్రేమతో సమయంలో కూడా బీఎస్ వీఎన్ ప్రసాద్, పవన్ కళ్యాణ్ మధ్య కూడా అత్తారింటికి దారేది అడ్వాన్స్ గురించి ఇలాంటి సీనే జరిగింది. ఇక ఇప్పుడు మరోసారి మరో వివాదం రేగింది.

మహేష్ 25వ చిత్రాన్ని వంశీ పైడిపల్లి డైరెక్ట్ చేస్తున్న విషయం తెలిసిందే. తొలుత ఈ ప్రాజెక్టును తామే నిర్మిస్తామంటూ పీవీపీ బ్యానర్ ప్రకటించటమే కాదు, మహేష్ బర్త్ డే కి ఓ పోస్టర్ కూడా రిలీజ్ చేసింది. అయితే బ్రహ్మోత్సవం దెబ్బ నుంచి బయటపడేయించేందుకే ఈ సినిమా చేయాలని డిసైడ్ అయిన మహేష్ రిస్క్ ఎందుకని వాళ్ల నష్టాన్ని పూడ్చటంతో ప్రాజెక్టులోకి దిల్ రాజు, సీనియర్ ప్రోడ్యూసర్ అశ్వనీదత్ లు ఎంటర్ అయ్యారు. ఈ విషయాన్ని కొద్దిరోజుల ముందే అఫీషియల్ గా కూడా చెప్పేసుకున్నాం.

అయితే పీవీపీ చేసిన నిర్వాకంతో దర్శకుడు వంశీ పైడిపల్లి చిక్కుల్లో పడ్డాడు. 'పీవీపీ సినిమా' అధినేత ప్రసాద్ వి.పొట్లూరి నిర్మాతల మండలికి ఫిర్యాదు చేశాడు. ఊపిరి సమయంలో తనతో వంశీ రెండు సినిమాల కోసం అగ్రిమెంట్ చేసుకున్నాడంట. దానిని బ్రేక్ చేస్తూ ఇప్పుడు వేరే నిర్మాతలతో సినిమా చేయటంపై పీవీపీ నిర్మాతల మండలిని ఆశ్రయించాడు. డీల్ ను కాదని, ప్రస్తుతం వంశీ మరోకరితో సినిమా చేస్తున్నాడని ప్రసాద్ అందులో ఆరోపించాడు. కాగా, ఫిర్యాదు వార్తను నిర్మాత మండలి ధృవీకరించింది. మరి ఈ విషయంలో మహేష్ ఇన్ వాల్వ్ అవుతాడా?, దిల్ రాజు ఏం చేయబోతున్నాడు? అసలు సినిమా పరిస్థితి ఏంటన్నది కొద్దిరోజుల్లోనే తేలిపోనుంది.