ప్రకాశ్ రాజ్ భుజంగయ్య గోల

Posted: 08/13/2016 01:16 PM IST

విలక్షణ నటుడు ప్రకాష్ రాజ్ మంచి అభిరుచి కలిగిన దర్శక నిర్మాత కూడా. కమర్షియల్ అంశాలు లేకపోయినా, చిత్రాల ఫలితం ఎలా ఉన్నా ఆయన సినిమాలో కంటెంట్ మాత్రం బాగానే ఉంటుంది. గత కొద్దీకాలంగా సినిమాలు బాగా తగ్గించేసిన ఈ మోనార్క్  సొంత ప్రాజెక్టు దర్శకత్వంలో తెగ బిజీ అయిపోయాడు. అదే మన ఊరి రామాయణం.

సందేశాన్ని మేళవిస్తూ తెరకెక్కించిన ఈ చిత్రం టీజర్ తాజాగా విడుదలైంది. భుజంగయ్య దుబాయి నుంచి తిరిగొచ్చిన ఓ వ్యక్తి. తన ఊర్లో జరిగే శ్రీరామనవమి ఏర్పాట్లకు ఖర్చుపెట్టడమే కాదు, దగ్గరుండి వాటిని చూసుకుంటాడు కూడా. అయితే అనుకోకుండా జరిగిన ఓ ఘటన అతని జీవితాన్ని మలుపు తిప్పుతుంది. అది ఏంటీ? అన్నదే కథ. ప్రతి మనిషిలో ఒక రాముడు ఒక రావణుడు ఉంటాడన్న కాన్సెప్ట్ తో ఇది తీర్చిదిద్దాడు. .

తెలుగు .. కన్నడ భాషల్లో ఆయన ఈ సినిమాను తెరకెక్కించాడు. ఈ సినిమాకి సంబంధించిన చాలా భాగం షూటింగ్ హైదరాబాద్ లోను .. 'కూర్గ్' లోను జరిపారు. ప్రియమణి వ్యాంప్ తరహా క్యారెక్టర్ లో నటిస్తున్న ఈ చిత్రం వచ్చే నెలలోనే ప్రేక్షకుల ముందుకు రానుంది.