అస్కార్ బరిలో రుద్రమదేవి

Posted: 08/11/2016 03:09 PM IST

తన ఆస్తులన్నీ తాకట్టుపెట్టి వ్యయ ప్రయాసలకూడ్చి భారీ బడ్జెట్ తో రుద్రమదేవిని తెరకెక్కించాడు దర్శకుడు గుణశేఖర్. ధైర్య సాహసాలకు ప్రతీకగా నిలిచిన రుద్రమదేవి జీవితచరిత్రనే సినిమాగా ఎంచుకుని, ఏడేళ్లు పరిశోధనలు చేసి శ్రమించి తీస్తున్నాడు అనగానే రిస్క్ చేస్తున్నాడని అన్నవారంతా... రిలీజ్ అయ్యాక ఆయన చేసిన పనే కరెక్ట్ అని పొగడకుండా ఉండలేకపోయారు.

విడుదలకు ముందు ఆర్థిక సమస్యలు వెంటాడిన సరే వాటన్నింటిని దాటి, అందరి మద్ధతులో విడుదల చేయించుకోగలిగి లాభాలను ఆర్జించాడు. లీడ్ పాత్రలో అనుష్క, చాళుక్య వీరభద్రుడిగా రానా నటించగా, కీలకమైన గోన గన్నారెడ్డిగా అల్లు అర్జున్ సినిమాకు ప్రాణం పోయటమే కాదు. జనాలు థియేటర్లకు రావటానికి ముఖ్యకారణం అయ్యాడు. కృష్ణంరాజు, ప్రకాష్ రాజ్ లాంటి హేమాహేమీలతోపాటు నిత్యామీనన్, కేథరిన్ లు ప్రధాన పాత్రలను పోషించిన ఈ సినిమా, కాకతీయ సామ్రాజ్యపు వైభవాన్ని చాటి చెప్పింది.

అనుష్క-గుణశేఖర్ వీరిద్దరి కెరియర్ లో చెప్పుకోదగిన చిత్రంగా 'రుద్రమదేవి' నిలిచింది. అలాంటి ఈ సినిమా ఆస్కార్ రేసులో నిలిచింది. ఫిల్మ్ ఫెడరేషన్ ఆఫ్ ఇండియా, బెస్ట్ ఫారిన్ లాంగ్వేజ్ ఫిల్మ్ కేటగిరి కింద 'రుద్రమదేవి'ని ఆస్కార్ అవార్డులకు పంపించింది. ఈ విషయాన్ని ట్విట్టర్ ద్వారా గుణశేఖర్ తెలియజేస్తూ, తన సంతోషాన్ని వ్యక్తం చేస్తున్నాడు. ఈ విషయంపై ఫిల్మ్ ఫెడరేషన్ నుంచి ఎటువంటి అధికారిక సమాచారం లేకపోవటం గమనార్హం.

FilmFederationOfIndiaRECOMMENDED #Rudhramadevi for the #OscarAward in the category of 'BestForeignLanguageFilmAward' pic.twitter.com/5EkmmtFQMb

— Gunasekhar (@Gunasekhar1) August 10, 2016