సోషల్ మీడియాలో రికార్డుల దుమ్ముదులుపుతున్న కబాలి..

Posted: 05/29/2016 09:59 AM IST

Audio rights of rajinikanth s kabali sold to think music

దక్షిణ భారత చిత్రాలు భారతీయ చలనచిత్రాల రికార్డులను తిరగరాస్తున్నాయి. జక్కన్న అద్భుత దృశ్యకావ్యం బాహుబలి కలెక్షన్ల రికార్డులను తిరగరాస్తే.. సినిమా విడుదలకు ముందే ఇప్పుడు సౌత్ ఇండియన్ సూపర్ స్టార్ రజనీకాంత్ ఆన్లైన్లో రికార్డుల మోత మోగిస్తున్నాడు. ఇటీవల రిలీజ్ అయిన రజనీ లేటెస్ట్ సినిమా కబాలి టీజర్.. ఊహకందని లెక్కలతో బాలీవుడ్ తారలకు కూడా చుక్కలు చూపిస్తోంది. యూట్యూబ్లో అత్యధిక మంది వీక్షించిన టీజర్గా రికార్డుల మీద రికార్డులు క్రియేట్ చేస్తోంది కబాలి. ఇప్పటికే రెండు కోట్లకు పైగా వ్యూస్తో ఇండియాలోనే అతి ఎక్కువ మంది వీక్షించిన తొలి సినిమాగా రికార్డ్ సృష్టించింది.

ఇక లైక్స్ విషయంలో అయితే అంతర్జాతీయ సినిమాలతో పోటి పడుతోంది కబాలి. 4 లక్షలకు పైగా లైక్స్ సాధించిన కబాలి టీజర్, అంతర్జాతీయ స్థాయిలో ఈ ఘనత సాధించిన రెండో చిత్రంగా నిలిచింది. హాలీవుడ్ సినిమా ఏవెంజర్స్ 5.12 లక్షల లైక్స్తో అగ్రస్థానంలో ఉంది. ఇదిలా ఉండగా జూన్ 9ల కబాలి తొలి థియట్రికల్ ట్రైలర్ రిలీజ్ అవుతోంది. టీజర్తోనే సంచలనాలు నమోదు చేసిన కబాలి.., ట్రైలర్తో ఇంకెన్ని రికార్డ్లు సృష్టిస్తాడో చూడాలి.

రజనీకాంత్ వయసుమల్లిన డాన్గా నటిస్తున్న ఈ సినిమాలో ఆయనకు జోడిగా రాధికా ఆప్టే నటిస్తుంది. యువ దర్శకుడు పా రంజిత్ డైరెక్షన్లో ప్రముఖ నిర్మాత కలైపులి యస్ థాను భారీ బడ్జెట్తో ఈ సినిమాను నిర్మిస్తున్నాడు. ప్రస్తుతం నిర్మాణాంతర కార్యక్రమాలు జరుపుకుంటున్న ఈ సినిమా జూలై 1న రిలీజ్కు రెడీ అవుతోంది. కాగా ఈ చిత్రానికి సంబంధించిన అడియో హక్కులను ధింక్ మ్యూజిక్ సంస్థ కొనుగోలు చేసింది. ఈ విషయాన్ని చిత్ర నిర్మాత కలైపులి ఎస్ థను తన ట్విట్టర్ అకౌంట్ ద్వారా తెలిపారు. త్వరలోనే చిత్ర అడియో రిలీజ్ వేడుకల విషయాలను కూడా పంచుకుంటానని చెప్పారు.

మనోహర్