స్టైలిష్ స్టార్-రాకింగ్ స్టార్ కాంబినేషన్ కు ఆపిల్ గౌరవం

Posted: 12/11/2015 03:42 PM IST

స్టైలిష్ స్టార్ - రాకింగ్ స్టార్ కాంబినేషన్ కు యాపిల్ సంస్థ ద్వారా మంచి గౌరవం దక్కింది. స్టైలిష్ స్టార్ అల్లు అర్జున్ హీరోగా రాకింగ్ స్టార్ దేవిశ్రీప్రసాద్ సంగీతంలో మాటల మాంత్రికుడు త్రివిక్రమ్ శ్రీనివాస్ దర్శకత్వంలో తెరకెక్కిన చిత్రం ‘సన్నాఫ్ సత్యమూర్తి’. ఈ సినిమా విడుదలై మంచి మ్యూజికల్ హిట్ చిత్రంగా నిలిచింది.

అల్లు అర్జున్ సరసన సమంత, నిత్యామీనన్ లు హీరోయిన్లుగా నటించారు. ఈ చిత్రానికి దేవిశ్రీప్రసాద్ అందించిన పాటలు బ్లాక్ బస్టర్ హిట్టయ్యాయి. ఇందులోని ‘సూపర్ మచ్చీ...’ పాటకు భారీ రెస్పాన్స్ వచ్చింది. అయితే ప్రతి ఏడాది ఆపిల్ సంస్థ ఐట్యూన్స్ స్టోర్ ద్వారా రిలీజ్ అయిన మ్యూజిక్ ఆల్బమ్స్లో బెస్ట్ ఆల్బమ్స్ను, ఆ ఏడాది చివరలోఎంపిక చేస్తోంది.

మ్యూజిక్ క్వాలిటీ, ప్రేక్షకాదరణ, సేల్స్.. ఇలా అన్ని అంశాలను దృష్టిలో వుంచుకొని ఓ బెస్ట్ ఆల్బంను సెలెక్ట్ చేస్తారు. అందులో భాగంగా ఈ ఏడాదికి దేవి సంగీతం అందించిన ‘సన్నాఫ్ సత్యమూర్తి’ చిత్రానికి ఆ అరుదైన గౌరవం దక్కింది. ఈ దెబ్బతో ‘సన్నాఫ్ సత్యమూర్తి’ చిత్ర టీంకు ప్రపంచ వ్యాప్తంగా గుర్తింపు లభించిదనే చెప్పుకోవాలి.