తిరుపతిలో సందడి చేయనున్న మహేష్ బ్రహ్మోత్సవం

Posted: 09/12/2015 10:27 AM IST

Mahesh babu brahmotsavam movie shooting starts in tirupati

‘శ్రీమంతుడు’ చిత్రం తర్వాత టాలీవుడ్ ప్రిన్స్ మహేష్ బాబు నటించబోతున్న తాజా చిత్రం ‘బ్రహ్మోత్సవం’. ‘సీతమ్మ వాకిట్లో సిరిమల్లె చెట్టు’ వంటి భారీ బ్లాక్ బస్టర్ హిట్ చిత్రం తర్వాత మహేష్ హీరోగా ప్రముఖ దర్శకుడు శ్రీకాంత్ అడ్డాల కలయికలో తెరకెక్కబోతున్న ఈ ‘బ్రహ్మోత్సవం’ చిత్రాన్ని భారీ బడ్జెట్ చిత్రాల నిర్మాణ సంస్థ పివిపి బ్యానర్ పై ప్రముఖ నిర్మాత ప్రసాద్.వి.పోట్లూరి నిర్మిస్తున్నారు.

ఈ చిత్ర షూటింగ్ ఈరోజు నుంచి ప్రారంభించాలని అనుకున్నారు కానీ.. కొన్ని అనివార్య కారణాల వల్ల వాయిదా వేసారు. ఈనెల 16 నుంచి ‘బ్రహ్మోత్సవం’ షూటింగ్ ఫస్ట్ షెడ్యూల్ ప్రారంభం కానుంది. ఈ మొదటి షెడ్యూల్ తిరుపతిలో జరుపుకోనుంది. మొదటి షెడ్యూల్ నుంచే మహేష్ పాల్గొననున్నాడు.

ఇందులో మహేష్ సరసన ముగ్గురు హీరోయిన్లు జతకట్టనున్నారు. సమంత, కాజల్ అగర్వాల్, ప్రణితలను హీరోయిన్లుగా ఎంపిక చేసారు. మిక్కీ జే మేయర్ సంగీతం అందిస్తున్నాడు. పూర్తి కుటుంబ కథా చిత్రంగా తెరకెక్కనున్న ఈ చిత్రాన్ని ఒకేసారి తెలుగు, తమిళ భాషలలో నిర్మించనున్నారు.

ప్రస్తుతం ఈ చిత్రానికి సంబంధించిన ప్రీ ప్రొడక్షన్ పనులు చివరి దశకు చేరుకున్నాయి. ఈ చిత్రాన్ని వచ్చే ఏడాది సంక్రాంతి కానుకగా జనవరి 8న విడుదల చేయడానికి నిర్ణయించారు. మరి ఈ సినిమా ఎలాంటి విజయం సాధించనుందో చూడాలి.