గ్యాంగ్ స్టార్ ‘కబలి’గా సూపర్ స్టార్

Posted: 08/18/2015 10:41 AM IST

Rajinikanth next film title kabali confirmed

తమిళ సూపర్ స్టార్ రజనీకాంత్ హీరోగా తమిళంలో ప్రముఖ దర్శకుడు రంజిత్ దర్శకత్వంలో ఓ చిత్రం తెరకెక్కునున్న విషయం తెలిసిందే. ఇందులో రజనీ ఓ గ్యాంగ్ స్టర్ డాన్ పాత్రలో నటించనున్నాడు. బాలీవుడ్ హాట్ భామ రాధిక ఆప్టే హీరోయిన్ గా నటించనుంది. రజనీకాంత్ కూతురిగా ధన్సికను ఎంపిక చేసారు. ప్రస్తుతం ఈ చిత్రానికి సంబంధించిన ప్రీ ప్రొడక్షన్ పనులు శరవేగంగా జరుగుతున్నాయి.

భారీ అంచనాలతో రూపొందుతున్న ఈ చిత్రాన్ని ఈనెల 21వ తేదిన చెన్నైలో ప్రారంభం కానుంది. ఈ చిత్రానికి ముందుగా ‘కాళీ’ అనే టైటిల్ ను పరిశీలించారు. కానీ తాజాగా ఈ చిత్రానికి ‘కబలి’ అనే టైటిల్ ను ఖరారు చేసారు. కబలీశ్వర్ అనే ఓ డాన్ జీవిత చరిత్ర ఆధారంగా ఈ చిత్రం తెరకెక్కుతున్నట్లుగా తెలిసింది.

కళైపులి ఎస్. థాను నిర్మాతగా రూపొందుతోన్న ఈ సినిమా తెలుగు, తమిళంలో ఏకకాలంలో తెరకెక్కించనున్నారు. వరుస ఫ్లాపులతో సతమతమవుతున్న రజనీకాంత్ కు మరి ఈ చిత్రం ఎలాంటి విజయం సాధించనుందో త్వరలోనే తెలియనుంది. త్వరలోనే ఈ చిత్ర వివరాలను అధికారికంగా ప్రకటించనున్నారు.