స్వాతి త్రిపుర షూటింగ్ పూర్తి... త్వరలోనే ఆడియో విడుదల!

Posted: 08/10/2015 09:56 AM IST

స్వాతి టైటిల్ రోల్ లో తెలుగు, తమిళ భాషల్లో ఏకకాలంలో రూపొందిన చిత్రం 'త్రిపుర'. తమిళ చిత్రం టైటిల్ 'తిరుపుర సుందరి'. జె. రామాంజనేయులు సమర్పణలో క్రేజీ మీడియా పతాకంపై ఎ. చినబాబు, ఎం. రాజశేఖర్ ఈ చిత్రాన్ని నిర్మించారు. 'గీతాంజలి' ఫేం రాజ కిరణ్ దర్శకత్వంలో రూపొందిన ఈ చిత్రం షూటింగ్ పూర్తయ్యింది.

విశేషం ఏంటంటే.. ఈ చిత్రానికి బిజినెస్ ఆఫర్స్ బాగున్నాయి. అలాగే, ఓ ప్రముఖ టీవీ చానల్ భారీ ఆఫర్ ఇచ్చి, ఈ చిత్రం శాటిలైట్ హక్కులను సొంతం చేసుకుంది. ఈ మధ్యకాలంలో పెద్ద చిత్రాల శాటిలైట్స్ అంత సజావుగా పూర్తి కావడంలేదు. సినిమా విడుదలైన తర్వాత, ఆ చిత్రవిజయాన్ని బట్టి శాటిలైట్ హక్కులు తీసుకుంటున్నారు. అలాంటిది ఈ చిత్రం స్టోరీ లైన్, సినిమాకి వచ్చిన క్రేజ్ ని చూసి, శాటిలైట్ హక్కులను ఆ చానల్ దక్కించుకుంది.

ఈ చిత్రవిశేషాలను చినబాబు తెలియజేస్తూ - ''ప్రస్తుతం నిర్మాణానంతర కార్యక్రమాలు జరుగుతున్నాయి. త్వరలో పాటలను విడుదల చేయాలనుకుంటున్నాం. మేం అనుకున్న విధంగా సినిమా బాగా వచ్చింది. స్వాతి నటన హైలైట్ గా నిలుస్తుంది. తెలుగు, తమిళ భాషల్లో మాత్రమే కాకుండా మలయాళ, కన్నడ, హిందీ భాషల్లోనూ ఈ చిత్రాన్ని నిర్మించాలని ఉంది. ఇది యునివర్శల్ కథాంశంతో రూపొందిన చిత్రం కాబట్టి, ఏ భాషకైనా నప్పుతుంది'' అన్నారు.

దర్శకుడు మాట్లాడుతూ - ''నా తొలి చిత్రం 'గీతాంజలి'కన్నా ఈ చిత్రం బాగా వచ్చింది. మంచి థ్రిల్లర్ మూవీ ఇది. స్వామి రారా, కార్తికేయ విజయాల తర్వాత స్వాతి చేసిన చిత్రం ఇది. ఈ చిత్రంతో ఆమె హ్యాట్రిక్ సాధించడం ఖాయం. సప్తగిరి చేసిన కామెడీ హైలైట్ గా నిలుస్తుంది. చంద్రబోస్, రామజోగయ్య శాస్ర్తి అందించిన సాహిత్యం ఓ హైలైట్. పిల్లలు, పెద్దలు అందరూ చూడదగ్గ ఎంటర్ టైనర్ ఇది'' అని చెప్పారు.

ఈ చిత్రానికి స్క్రీన్ ప్లే : కోనవెంకట్, శ్రీనివాస్ వెలిగొండ, మాటలు: రాజా, సంగీతం: కమ్రాన్, సినిమాటోగ్రఫీ: రవికుమార్ సానా, ఎడిటింగ్: ఉపేంద్ర, పాటలు: చంద్రబోస్, రామజోగయ్యశాస్త్రి, నిర్మాతలు: ఎ.చినబాబు, ఎం. రాజశేఖర్, కథ-దర్శకత్వం: రాజకిరణ్.