‘శ్రీమంతుడు’ స్పెషల్ షోపై కొరటాల శివ క్లారిటీ

Posted: 07/23/2015 04:25 PM IST

Director koratala shiva clarifies on srimanthudu movie special show

కొరటాల శివ దర్శకత్వంలో మహేష్ బాబు, శృతిహాసన్ హీరోహీరోయిన్లుగా నటించిన ‘శ్రీమంతుడు’ చిత్రం విడుదలకు సిద్ధమవుతోంది. ఈ చిత్రాన్ని ఆంధ్రప్రదేశ్, తెలంగాణ ముఖ్యమంత్రులైన నారా చంద్రబాబు నాయుడు మరియు కె.చంద్రశేఖర్ రావు గార్లకు, అలాగే భారత ప్రధాని నరేంద్ర మోడీ గారికి ప్రత్యేక షో వేసి చూపించడానికి చిత్ర యూనిట్ సన్నాహాలు చేస్తున్నట్లుగా కొద్దిరోజులుగా వార్తలొస్తున్న విషయం తెలిసిందే.

అయితే ఈ విషయంపై చిత్ర యూనిట్ స్పందించింది. ఈ విషయంపై దర్శకుడు కొరటాల శివ మాట్లాడుతూ... ప్రధానమంత్రి మరియు తెలంగాణ, ఆంధ్రప్రదేశ్ ముఖ్యమంత్రులకు ప్రత్యేక షో వేయాలని మేమింకా అనుకోలేదు. ఓ ఎన్నారై ఒక గ్రామాన్ని దత్తత తీసుకొని ఎలా డెవలప్ చేసాడు అనే ఒక పాయింట్ తో సాగుతుంది. అందుకే ఈ పాయింట్ ను అందరికీ చేరువయ్యేలా ఒకసారి పలు రాజకీయ నాయకులు, బిజినెస్ మెన్స్ కు చూపించాలని అనుకున్నాం. కానీ ఇప్పటి వరకు ఎవరిని కూడా సంప్రదించలేదు. ఒకవేళ ఎవరినైనా సంప్రదించినా కూడా దాదాపు 90% సినిమా విడుదలయ్యాకే ప్రత్యేక షో వేసే అవకాశం వుంది. ఈ విషయంపై ఓ క్లారిటీ వచ్చాక త్వరలోనే అధికారికంగా ఓ ప్రకటన విడుదల చేస్తామని అన్నారు.

ఇప్పటికే విడుదలైన పాటలు, ట్రైలర్లకు భారీ స్పందన వస్తుంది. జగపతి బాబు, రాజేంద్రప్రసాద్, సుకన్య, పూర్ణ తదితరులు ముఖ్య పాత్రలలో నటించారు. ఈ చిత్రాన్ని ఆగష్టు 7న ప్రపంచ వ్యాప్తంగా భారీ ఎత్తున విడుదల చేయనున్నారు. మరి ఈ సినిమా ఎలాంటి విజయం సాధించనుందో త్వరలోనే తెలియనుంది.