నితిన్, పూరీలకు క్షమాపణలు చెప్పిన జ్యోతిలక్ష్మీ

Posted: 06/16/2015 11:03 AM IST

‘హర్ట్ ఎటాక్’ చిత్రం తర్వాత పూరీ జగన్నాధ్ దర్శకత్వంలో నితిన్ హీరోగా ఓ చిత్రం తెరకెక్కబోయి, ఆగిపోయిన విషయం తెలిసిందే. అయితే ఈ చిత్రం ఆగిపోవడంపై ఛార్మి ఇటీవలే ఓ ఇంటర్వ్యూలో పలు ఆసక్తికర విషయాలను చెప్పుకొచ్చింది. ‘జ్యోతిలక్ష్మీ’ సినిమాకు ప్రొడక్షన్ మొత్తం దగ్గరుండి చూసుకున్న ఈ అమ్మడు... పూరీ తర్వాతీ సినిమాలో కూడా తెగ జోక్యం చేసుకుంటుందట. దీంతో పూరీ తర్వాతీ సినిమాపై పలు కామెంట్లు చేసేసింది.

ఆ ప్రాజెక్టు ఆర్థిక ఇబ్బందుల కారణంగానే ఆగిపోయిందంటూ ఛార్మి తెలిపింది. కానీ పూరీతో నితిన్ ప్రాజెక్టు ఆగిపోవడానికి గల కారణం ఛార్మినే అని పలు వార్తలు వినిపిస్తున్నాయి. నితిన్, పూరీల ప్రాజెక్టు నిర్మాణ విషయంలో ఛార్మి కూడా జోక్యం చేసుకుంటుందని, అందుకే ఈ ప్రాజెక్టు నుంచి నితిన్ తప్పుకున్నాడని గుసగుసలు వినిపిస్తున్నాయి.

అయితే తాను చేసిన కామెంట్లపై ఛార్మి మళ్లీ వివరణ ఇచ్చుకోలేక తప్పలేదు. తాజాగా ఈ విషయంపై ఛార్మి స్పందిస్తూ... నిజానికి పూరీ, నితిన్ ల ప్రాజెక్టు ఎందుకు ఆగిపోయిందో తనకు కూడా స్పష్టంగా తెలియదని, అయితే ఏవో కొన్ని ఆర్థిక ఇబ్బందుల వల్ల ఈ ప్రాజెక్టు ఆగిపోయిందని ఎవరో చెబితే అదే నిజమనుకొని చెప్పేసానని తెలిపింది. కానీ నిజానిజాలు తెలుసుకోకుండా అలా నేరుగా చెప్పినందుకు సిన్సియర్ గా క్షమాపణలు తెలియజేస్తున్నానని ఛార్మి తన ట్విట్టర్ ద్వారా తెలియజేసింది.