అన్నాదమ్ముల అనుబంధం.. వెండితెరపై ‘బృందావనం’

Posted: 06/01/2015 10:20 AM IST

నందమూరి వారసులైన జూనియర్ ఎన్టీఆర్, కళ్యాణ్ రామ్ ఇద్దరూ కలిసి ఒక్క చిత్రంలోనూ నటించలేదు. కనీసం గెస్ట్ పాత్రల్లో సైతం వీరు నటించలేదు. అయితే.. ఇప్పుడు ఈ అన్నాదమ్ములిద్దరూ కలిసి వెండితెరపై ‘బృందావనం’ పండించేందుకు సిద్ధమవుతున్నారని సమాచారం! త్వరలోనే ఈ నందమూరి హీరోలు ఓ ప్రాజెక్ట్ కోసం జడకడుతున్నారని తెలుస్తోంది. ఇప్పటికే ఈ ఇద్దరూ హీరోలు కలిసి ఓ చిత్రాన్ని చేయడానికి అన్ని ఏర్పాట్లు జరుగుతున్నాయని ఇండస్ట్రీ న్యూస్!

అయితే.. ఈ సినిమాలో ఒక హీరో వెండితెరపై మ్యాజిక్ చేయగా.. మరొకరు తెరవెనుక వుంటూ రంగులు పూయనున్నారు. అంటే.. నందమూరి కళ్యాణ్ రామ్ నిర్మాతగా వ్యవహరిస్తుండగా.. ఎన్టీఆర్ కథానాయకుడిగా నటిస్తాడు. ఈ చిత్రానికి ప్రముఖ రచయిత వక్కంతం వంశీ దర్శకత్వం వహించనున్నాడు. నిజానికి వంశీ దర్శకత్వంలో ఎన్టీఆర్ ఎప్పుడో సినిమా చేయాల్సి వుండేది కానీ.. కొన్ని అనివార్య కారణాల వల్ల వాయిదా పడుతూ వచ్చింది. ఇప్పటికీ అది ఆ మూవీకి సంబంధించిన పనులు జరుగుతూనే వున్నాయి. ఇప్పుడు అది ఒక కొలిక్కి వచ్చిన నేపథ్యంలో ఈ ప్రాజెక్టును మొదలుపెట్టేందుకు సన్నాహాలు చేస్తున్నారు.

ప్రస్తుతం ఈ సినిమాకి సంబంధించి స్ర్కిప్ట్ వర్క్ జరుగుతోంది. మరోవైపు.. ఈ సినిమాకి కావాల్సిన నటీనటుల ఎంపిక కూడా ఇప్పటినుంచే స్టార్ట్ చేస్తున్నారని తెలుస్తోంది. ఇక పాత్రకు తగ్గట్టు స్టార్ హీరోయిన్ నే ఈ చిత్రంలో తీసుకోవాలని యూనిట్ నిర్ణయించినట్లు చెప్పుకుంటున్నారు. అక్టోబర్ నెల నుంచి ఈ సినిమా సెట్స్ సైకి వెళుతుందని.. అక్కడి నుంచి శరవేగంగా షూటింగ్ కంప్లీట్ చేసుకుని సంక్రాంతి కానుకగా లేదా మార్చిలో విడుదల చేసే అవకాశాలున్నాయని వార్తలొస్తున్నాయి. చివరికీ నందమూరీ అన్నాదమ్ములు ఈ విధంగా కలవడంతో నందమూరి అభిమానులు సంతోషం వ్యక్తం చేస్తున్నట్లు తెలుస్తోంది.