చిరు చెప్పిన ఆటోజానీ విశేషాలు

Posted: 05/16/2015 04:20 PM IST

గతకొద్ది కాలంగా వినిపిస్తున్న వార్తలు గతకొద్ది రోజులుగా మరింత ఎక్కువయ్యాయి. ఇక ఆ వార్తలు రోజురోజుకి మరింత ఉత్కంఠను కలుగజేస్తున్నాయి. అయితే ఈ ఉత్కంఠ కేవలం మెగా అభిమానుల్లో మరింత ఎక్కువగా వుంది. అసలు విషయం ఏమిటంటే... మెగాస్టార్ చిరంజీవి నటించబోయే 150వ చిత్రం కోసం ప్రస్తుతం ఏర్పాట్లు జరుగుతున్న విషయం తెలిసిందే.

ప్రముఖ దర్శకుడు పూరీ జగన్నాథ్ దర్శకత్వంలో చిరంజీవి హీరోగా ‘ఆటోజానీ’ పేరుతో ఈ 150వ చిత్రం తెరకెక్కనుంది. కానీ ఈ చిత్రం ఎప్పుడు ప్రారంభమవుతుందా అని అభిమానులు ఎంతో ఆతృతతో ఎదురుచూస్తున్నారు. ఈ విషయంపై తాజాగా చిరంజీవి ఓ క్లారిటీ ఇచ్చేసాడు.

ఆగష్టులో ఈ ప్రాజెక్టు సెట్స్ పైకి వెళ్లనుందని, అలాగే ఈ చిత్రాన్ని తన తనయుడు రాంచరణ్ తో పాటు బండ్ల గణేష్ లు కలిసి సంయుక్తంగా నిర్మించనున్నారని తెలిపారు. ఇంకా మిగతా వివరాలేమి చెప్పలేదు చిరు. ఈ చిత్రాన్ని చిరు పుట్టినరోజు(ఆగష్టు 22)న ప్రారంభించనున్నారు. ఈ చిత్రానికి కోనవెంకట్, బివిఎస్ఎన్ రవిలు స్ర్కిప్టును సమకూరుస్తున్నారు.

అన్ని లోకేషన్లు, నటీనటులు, సాంకేతిక నిపుణులు ఖరారు అయ్యాక నిరవధికంగా షూటింగ్ జరిపి, కేవలం మూడు నెలలోపే ఈ చిత్రాన్ని పూర్తి చేయాలని పూరీ పక్కాగా ప్లాన్ వేసినట్లుగా తెలిసింది. త్వరలోనే అన్ని వివరాలు అధికారికంగా ప్రకటించనున్నారు.