అయ్యయ్యో... అంత కష్టం పడ్డవా షారుక్ బాబు!

Posted: 04/15/2015 12:31 PM IST

బాలీవుడ్ బాద్షా, హీరో షారుక్ ఖాన్ కు వున్న ఫ్యాన్ ఫాలోయింగ్ గురించి ప్రత్యేకంగా చెప్పుకోనవసరం లేదు. ప్రపంచ వ్యాప్తంగా షారుక్ కు అభిమానులున్నారు. అయితే ప్రపంచ వ్యాప్తంగా వున్న ధనిక సినీ తారల్లో షారుక్ ద్వితీయ స్థానంలో వున్నాడంటూ గతకొద్ది కాలంగా వార్తలొస్తున్న విషయం తెలిసిందే.

వరుసగా షారుక్ తన సినిమాలతో బాక్సాఫీస్ వద్ద కలెక్షన్ల వర్షం కురిపిస్తూ... భారీగా సంపాదించేస్తున్నాడు అంటూ సినీవర్గాల అభిప్రాయం. కానీ షారుక్ నిజానికి సినిమాలతో కూడా తన డాన్సులతో ఆ డబ్బు సంపాదిస్తున్నాడట. అసలు సినిమాలు కూడా తీయలేని పరిస్థితిలో వుంటే తనకు తన డాన్సే డబ్బులు సంపాదించి పెడుతోందని షారుక్ అంటున్నాడు.

ఇటీవలే ప్రపంచ వ్యాప్తంగా వున్న అధిక సినీ సంపన్నులలో షారుక్ రెండవ స్థానంలో వున్నాడంటూ వార్తలొస్తున్న విషయం తెలిసిందే. ఈ వార్తలపై షారుక్ తనదైన శైలిలో స్పందించారు. తాను డబ్బు విషయంలో అత్యధిక సంపన్నున్ని కాదని, కొన్ని కోట్ల మంది అభిమానులు మనసు దోచుకున్న ధనికున్ని మాత్రమేనని.. అదే తనకు నిజమైన సంపద అంటూ చెప్పుకొచ్చాడు.

అలాగే ఇటీవలే తాను నటించిన ‘హ్యాపీ న్యూఇయర్’ చిత్ర షూటింగ్ సమయంలో నిర్మాతలు తనకు ఫోన్ చేసి, అనుకున్న బడ్జెట్ పూర్తిగా అయిపోయిందని... ప్రస్తుతం వారి దగ్గర డబ్బులు కూడా లేవని చెప్పారంట. దీంతో షారుక్ స్పందిస్తూ... పెళ్లిళ్లకు, ప్రత్యేక కార్యక్రమాల్లో డాన్స్ చేసి తాను డబ్బు సమకూరుస్తానని మాటిచ్చాడట. తాను ఇచ్చిన మాటకు తగ్గట్లుగానే వివిధ కార్యక్రమాల్లో పాల్గొని, డాన్స్ చేసి, డబ్బు సంపాదించి ఆ సినిమా చివరి షెడ్యూల్ ను ఎలాంటి ఆటంకం లేకుండా పూర్తి చేసామని షారుక్ చెప్పుకొచ్చాడు.

ఆ తర్వాత వెంటనే ట్విట్టర్లో తాను ప్రపంచ వ్యాప్తంగా అత్యంత ధనికుల్లో రెండవ వ్యక్తినని అంటూ వచ్చిన వార్తలు చూసి నవ్వాలో, ఏడవాలో అర్థం కాలేదని చెప్పుకొచ్చాడు. మొత్తానికి షారుక్ తన సినిమాలతోనే కాకుండా తన స్పెషల్ డాన్సులతో కూడా సంపాదిస్తూ బిజీగా వున్నాడని అర్థమవుతోంది.