గెలుపెవరిదీ అయినా.. మేలు జరుగుతుంది..

Posted: 03/29/2015 06:36 PM IST

టాలీవుడ్ చిత్ర పరిశ్రమలోని మూవీ ఆర్టిస్ట్ అసోసియేషన్ (మా) అధ్యక్ష ఎన్నికలు ప్రశాంతంగా ముగిసాయని.. గతానికి భిన్నంగా ఇద్దరు ప్రముఖ సీనియర్ నటుల మధ్య అత్యంత ప్రతిష్టాత్మకంగా ఎన్నికలు సాగినా.. ఎవరు గెలిచినా ఆర్టిస్టులకు, వారి కుటుంబాలకు మంచి జరుగుతుందని ప్రముఖ నట దంపతులు జీవితా రాజశేఖర్ అన్నారు. మీడియా ప్రచారం కారణంగా పెద్ద హైప్ వచ్చినందునే.. మా ఎన్నికలు సాధరణ ఎన్నికల శోభను సంతరించుకుందని అభిప్రాయపడ్డారు.

కాగా, ఓటింగ్ శాతం తక్కువగా నమోదు కావడం పట్ల అమె అసంతృప్తి వ్యక్తం చేశారు. సీనీ ఆర్టిస్టులకు సెలవు దినమైన రెండో అదివారం రోజున ఎన్నికలను నిర్వహించి వుంటే.. ఓటింగ్ శాతం మరికోంత అధికంగా నమోదై వుండేదని చెప్పారు. అలా కాకపోయినా నిర్మాతల మండలికి ముందస్తుగా సమాచారం అందించి వున్నా.. వారు ఇవాళ సెలవు దినంగా ప్రకటించి వుండేవారని అమె అభిప్రాయపడ్డారు. సమీపంలో షూటింగ్ జరుపుకుంటున్న ఆర్టిస్టులు.. కొంత విరామ సమయంలో వచ్చి ఓటు హక్కును వినియోగించుకున్నా.. దూర ప్రాంతాల్లో షూటింగ్ జరుపుకునే వారికి ఎంత కష్టమో ఎలా వర్ణించగలమని రాజశేఖర్ అవేదన వ్యక్తం చేశారు.

జి. మనోహర్