తూచ్.. అదంతా అబద్ధం.. అసలా ఆలోచనే లేదు!

Posted: 03/13/2015 04:52 PM IST

బాలీవుడ్ మిస్టర్ పర్ ఫెక్షనిస్ట్ అమీర్ ఖాన్ ప్రధానపాత్రలో నటించిన ‘పీకే’ చిత్రం ఇటీవలే విడుదలై బాక్సాఫీస్ రికార్డులను తిరగరాసింది. దొంగబాబాల అసత్య ప్రచారాలను నమ్మకూడదనే కథతో తెరకెక్కిన ఈ చిత్రం అన్నివర్గాల వారిని ఆకర్షించడంతో వసూళ్లపరంగా సంచలనం సృష్టించింది.

ఇంతటి ఘనవిజయాన్ని సాధించిన ఈ మూవీని  తమిళంలో రీమేక్ చేయనున్నట్లుగా ఆమధ్య రూమర్లు వచ్చిన విషయం తెలిసిందే! అందులో అమీర్ పాత్రను లోకనాయకుడు కమల్ హాసన్ చేయనున్నాడని ప్రచారం కూడా జరిగింది. అయితే.. ఈ వార్తలన్నీ అబద్ధాలంటూ ఆ మూవీ దర్శకనిర్మాత రాజ్ కుమార్ హిరాణీ కొట్టిపారేశారు. ‘పీకే’ చిత్రాన్ని తమిళంలో రీమేక్ చేసే ఆలోచన తమకు అస్సలు లేదని ఆయన స్పష్టం చేస్తున్నాడు.

ఈ నేపథ్యంలోనే ఈ చిత్ర నిర్మాత మాట్లాడుతూ.. ‘ఈ సినిమా రీమేక్ రైట్స్ ఇంకా ఎవరికీ ఇవ్వలేదు. అసలు దీనిని తమిళంలో రీమేక్ చేసే ఆలోచన కూడా మాకు లేదు. అయితే.. కొంతమంది తమిళ నిర్మాతలు ఈ మూవీ రీమేక్ హక్కులను అడిగిన మాట మాత్రం వాస్తవమే’ అని ఆయన వివరించాడు. ఇక కమల్ హాసన్ కూడా ఈ రీమేక్ లో తాను నటించడం లేదని గతంలో వెల్లడించిన విషయం విదితమే!