పటాస్ కుర్రాడి కోసం మెగా హీరోలు

Posted: 02/09/2015 11:47 AM IST

నందమూరి కళ్యాణ్ రామ్ ‘పటాస్’ సినిమా ఇటీవలే విడుదలై బ్లాక్ బస్టర్ హిట్టయ్యిన విషయం తెలిసిందే. యాక్షన్, ఎంటర్ టైనర్ గా రూపొందిన ఈ చిత్రం హీరోగా, నిర్మాతగా కళ్యాణ్ రామ్ కు భారీ క్రేజ్, డబ్బులను తెచ్చిపెట్టింది. ఇప్పటికీ హౌస్ ఫుల్ కలెక్షన్లతో దూసుకుపోతుంది. కళ్యాణ్ రామ్ ను ఓ కొత్త పాత్రలో చూపించి, దర్శకుడిగా మొదటి సినిమాతోనే హిట్టు కొట్టాడు.

కళ్యాణ్ రామ్ కు ఎంత పేరొచ్చిందో... దర్శకుడు అనిల్ రావిపూడికి కూడా భారీ క్రేజ్ వచ్చింది. దర్శకుడిగా తొలి సినిమా అయినప్పటికీ... బాగా కసితో తీసి ఓ కమర్షియల్ దర్శకుడిగా మంచి పేరు తెచ్చుకున్నాడు. దీంతో అనిల్ కు ప్రస్తుతం టాలీవుడ్ లో భారీ డిమాండ్ ఏర్పడింది.

ఈ దర్శకుడితో సినిమా చేయడానికి మెగా హీరోలు ప్రయత్నిస్తున్నట్లుగా తెలిసింది. అనిల్ దర్శకత్వంలో అల్లు అర్జున్ ఓ సినిమా చేయడానికి సిద్ధంగా వున్నట్లుగా తెలిసింది. ప్రస్తుతం బన్నీ చేస్తున్న త్రివిక్రమ్ సినిమా పూర్తవ్వగానే అనిల్ తో బన్నీ ఓ సినిమా చేసే అవకాశం వున్నట్లుగా టాలీవుడ్ లో వార్తలొస్తున్నాయి.

అలాగే అనిల్ తో సినిమా చేయడానికి రాంచరణ్ కూడా ప్రయత్నిస్తున్నట్లుగా సమాచారం. కుదిరితే మరోసారి కళ్యాణ్ రామ్ తోనే సినిమా తీయడానికి ఈ ‘పటాస్’ దర్శకుడు సిద్ధంగా వున్నట్లుగా తెలిసింది. అయితే అనిల్ మాత్రం ఇంకా ఎలాంటి నిర్ణయం తీసుకోలేదు. త్వరలోనే తన కొత్త సినిమా వివరాలను అధికారికంగా ప్రకటించనున్నాడు.