రుద్రమదేవి ఆడియో రిలీజ్ డేట్

Posted: 02/02/2015 03:30 PM IST

అనుష్క, రానా ప్రధాన పాత్రలలో నటించిన తాజా చిత్రం ‘రుద్రమదేవి’. ప్రముఖ దర్శకుడు గుణశేఖర్ దర్శకత్వంలో స్టీరియో స్కోపిక్ ద్వారా తెరకెక్కిస్తున్న హిస్టారికల్ 3డి మూవీ ఇటీవలే షూటింగ్ పూర్తిచేసుకొని, పోస్ట్ ప్రొడక్షన్ పనులను శరవేగంగా జరుపుకుంటోంది.

మాస్ట్రో ఇళయరాజా సంగీతం అందిస్తున్నారు. ఈ చిత్ర ఆడియోకు భారీ డిమాండ్ ఏర్పడింది. అయితే చివరకు భారీ మొత్తానికి ప్రముఖ ఆడియో సంస్థ ‘లహరి మ్యూజిక్’ ఈ ఆడియో హక్కులను సొంతం చేసుకుంది. ఈ సంధర్భంగా లహరి మ్యూజిక్ సంస్థ అధినేత జి.మనోహర్ నాయుడు తన సంతోషాన్ని మీడియాతో పంచుకున్నారు.

ఈ సంధర్భంగా ఆయన మాట్లాడుతూ... ఈ ఏడాది ప్రారంభంలో మా సంస్థ ద్వారా వచ్చిన ‘గోపాల గోపాల’ ఆడియో టాప్ స్థానంలో వుంది. అయితే ఈ ‘రుద్రమదేవి’ చిత్రానికి ఇళయరాజా సంగీతం అందించారు. ఇళయరాజా సంగీతం అందించిన చాలా పాటలు వీరి మ్యూజిక్ ఆల్బం ద్వారా వచ్చాయని తెలిపారు. అలాగే ‘రుద్రమదేవి’ చిత్రానికి ఆయనే సంగీతం అందించడంతో ఎంత రేటుకైనా సొంతం చేసుకోవాలనే ఉద్దేశ్యంతో భారీ ఫ్యాన్సీ రేటుకు దక్కించుకున్నట్లుగా తెలిపారు. ఈ చిత్ర ఆడియోను ఈనెల మూడవ వారంలో విడుదల చేయబోతున్నట్లుగా తెలియజేసారు.

ఈ సినిమాలో అల్లు అర్జున్ ‘గోన గన్నారెడ్డి’ పాత్రలో నటించారు. కృష్ణం రాజు, నిత్య మీనన్, కేథరిన్, హంసా నందిని, ప్రకాష్ రాజ్ తదితరులు ముఖ్య పాత్రల్లో కనిపించనున్నారు. ఈ చిత్ర ఫస్ట్ లుక్ ట్రైలర్ ను ‘టెంపర్’ సినిమాతో విడుదల చేయనున్నారు. ఈ సినిమాను వేసవి సెలవుల్లో విడుదల చేయనున్నారు.