‘బాహుబలి’పై పోలీసుల హెచ్చరికలు...

Posted: 01/27/2015 10:59 AM IST

Police warnings bahubali movie raw video leakage social media websites spread

తెలుగు చిత్రపరిశ్రమలోనే ఎంతో ప్రతిష్టాత్మకమైన చిత్రంగా ‘బాహుబలి’ రూపొందుతున్న విషయం తెలిసిందే! దర్శకధీరుడు రాజమౌళి దర్శకత్వంలో ప్రభాస్ మెయిన్ లీడ్’లో నటిస్తున్న ఈ చిత్రం షూటింగ్ గతరెండేళ్ల నుంచి ఎంతో రహస్యంగా జరుగుతూనే వుంది. సెట్స్’కి సంబంధించిగానీ, మూవీకి సంబంధించిన వ్యవహారాలుగానీ బయటకు లీక్ కాకుండా ఎంతో గోప్యంగా వుంచుతున్నారు. అంతా సవ్యంగానే జరుగుతున్న నేపథ్యంలో అనుకోకుండా కొన్ని పరిణామాలు చోటు చేసుకోవడంతో ఈ మూవీపై పోలీసులు హెచ్చరికలను జారీ చేశారు. దీంతో ఇది సంచలనంగా మారింది. అసలు పోలీసులకు, మూవీకి సంబంధం ఏంటని అనుకుంటున్నారు.. అయితే మేటర్’లోకి వెళ్లాల్సిందే!

వివరాల్లోకి వెళ్తే.. గతకొన్నాళ్ల నుంచి ఎంతో గోప్యంగా షూటింగ్ జరుపుకుంటున్న ఈ మూవీకి సంబంధించి ఇటీవలే 12 నిముషాల నిడివిగల ‘రా’ వీడియో ఫుటేజ్ యూట్యూబ్’లో లీకయ్యింది. దీనిని వెంటనే పసిగట్టిన యూనిట్ సభ్యులు యూట్యూబ్ నుంచి ఆ వీడియోను తొలగించడంలో సక్సెస్ అయ్యారు. కానీ.. ఆ వీడియో లీకైన వెంటనే కొందరు సోషల్ మీడియాలో షేర్ చేసుకోవడం జరిగింది. ఆ దెబ్బతో ఆ వీడియో సోషల్ మీడియాలో ఇంకా హల్’చల్ చేస్తూనే వుంది. ఒకరి తర్వాత మరొకరు దానిని షేర్ చేసుకుంటూ స్ర్పెడ్ చేస్తున్నారు. దీంతో ఈ విషయంపై నిర్మాతలు, ఫిల్మ్ చాంబర్’కి చెందిన పైరసీ సెల్ వారు సీరియస్’గా తీసుకుని పోలీసులకు ఫిర్యాదు చేశారు.

దీంతో రంగంలోకి దిగిన పోలీసులు తమదైన స్టైల్లో విచారణ చేపట్టారు. ఈ వీడియోని ఎవరు లీక్ చేశారో అతడిని ముందుగా అరెస్ట్ చేశారు. బాహుబలి సినిమా విజువల్ ఎఫెక్ట్ ఎడిటింగ్ జరుగుతున్న చోట గతంలో పనిచేసిన ఉద్యోగే ఈ నేరానికి పాల్పడినట్లుగా పోలీసులు గుర్తించినట్లు చెబుటున్నారు. అలాగే సోషల్ మీడియాలో హల్’చల్ చేస్తున్న ఆ వీడియోను ఫేస్’బుక్, ట్విట్టర్ వంటి సామాజిక వెబ్’సైట్లలో స్ర్పెడ్ చేస్తున్న వారిపై కేసులు ఫైల్ చేశారు. తెలంగాణ, ఆంధ్రప్రదేశ్ పోలీస్ డిపార్ట్’మెంట్స్, సైబర్ క్రైమ్ డివిజన్ వారు ఈ సోషల్ మీడియాలో షేర్ చేస్తున్న వారిని ట్రాక్ చేసి, వారిని పట్టుకోనున్నారు. ఇప్పటికే ఇలా కొంతమందిని అరెస్ట్ చేసినట్లు సమాచారం!

మరెవరైనా ఆ లీకేజి వీడియోను సామాజిక మాధ్యమాల్లో షేర్ చేసినా, లైక్ కొట్టినా వారిపై కఠిన చర్యలు తీసుకోనున్నారని పోలీసులతోబాటు ఫిల్మ్ ఇండస్ట్రీ పైరసీ టీం కూడా హెచ్చరికలు జారీ చేసింది. ఎంతో కష్టపడి చిత్రబృందం తెరకెక్కించిన ఈ మూవీలోకి ఓ వార్ సీక్వెన్స్ ఇలా బయటికి రావడంతో వాళ్ల కష్టం వృథా అయిందని పలువురు అభిప్రాయం వ్యక్తం చేస్తున్నారు. ఇకనుంచి ఎవరూ ఆ వీడియోన్ షేర్ చేయకూడదని, తెలుగు ఇండస్ట్రీకి సిగ్గుచేటని అంతా అనుకుంటున్నారు.