Posted: 08/19/2012 07:08 PM IST

       అపరచితుడు చిత్రం ద్వారా తెలుగు ప్రేక్షకులకు కూడా సుపరిచయుడైన తమిళ కథానాయకుడు విక్రమ్ త్వరలో 'మనోహరుడు'గా  దర్శనమివ్వనున్నాడు. ప్రముఖ దర్శకుడు శంకర్ తాజాగా విక్రమ్ హీరోగా తమిళంలో 'ఐ' పేరుతో ఓ చిత్రాన్ని ప్రారంభించిన విషయం మనకు తెలిసిందే. ఈ సినిమా తెలుగు వెర్షన్ కి 'మనోహరుడు'గా నామకరణం చేశారు. ఇందులో విక్రమ్ రెండు విభిన్న తరహా పాత్రల్ని పోషిస్తాడు. ఆయన సరసన ఓ కథానాయికగా ఎమీ జాక్సన్ ఇప్పటికే ఎంపిక కాగా, మరో కథానాయిక ఎంపిక జరగాల్సివుంది. ఏ.ఆర్.రెహమాన్ సంగీతం సమకూరుస్తున్న ఈ చిత్రానికి విక్రమ్ తన పారితోషికంగా 15 కోట్లు తీసుకుంటున్నట్టు వార్తలు వస్తున్నాయి.
    ఇదిలా ఉండగా,  నిన్నటితరం అందాలతార శ్రీదేవి త్వరలో ఓ త్రీడీ సినిమాలో నటించనుంది. పాతికేళ్ల క్రితం అనిల్ కపూర్, శ్రీదేవి జంటగా వచ్చిన 'మిస్టర్ ఇండియా' చిత్రానికి సీక్వెల్ రూపొందించడానికి సన్నాహాలు జరుగుతున్నాయి. దీనిని 3D ఫార్మేట్లో నిర్మిస్తారు. ఈ 'మిస్టర్ ఇండియా-2'లో మళ్లీ అనిల్, శ్రీదేవి జంటే నటించనుంది. శ్రీదేవి భర్త బోనీకపూర్ ఈ చిత్రాన్ని నిర్మించే యోచన చేస్తున్నారు. ఒరిజినల్ లో అమ్రిష్ పురీ పోషించిన విలన్ పాత్రను ఈ సీక్వెల్ లో సల్మాన్ ఖాన్ పోషించే అవకాశం వుంది. ఆ విషయంపై ఇప్పటికే సల్మాన్ తో చర్చలు జరుగుతున్నాయి. ఇదిలా ఉంచితే, 'మిస్టర్ ఇండియా' చిత్రాన్ని కూడా ఇప్పుడు త్రీడీ రూపంలోకి కన్వర్ట్ చేస్తున్నారు.  

...avnk