Posted: 08/08/2012 08:41 PM IST

      పవన్ అభిమానులకు పూరీ ఇచ్చిన మాట నిలుపుకునే సమయం ఆసన్నమైంది. పవన్ హీరోగా రూపొందుతోన్న 'కెమెరామెన్ గంగతో రాంబాబు' చిత్రం ప్రస్తుతం షూటింగ్ దశలో ఉంది. అయితే ఈ సినిమాలో పవన్ తో కలిసి నటించే అవకాశం ఆయన అభిమానులకి ఇస్తానని పూరీ జగన్నాథ్ గతంలో మాటిచ్చారు. ఇటీవల ఓ రోజున ఆ అవకాశాన్ని కల్పించారుగానీ ... వర్షం కారణంగా షూటింగును కేన్సిల్ చేసుకున్నారు. మళ్లీ తాజాగా పూరీ ట్విట్టర్ ద్వారా పవన్ అభిమానులకు ఆహ్వానం పలికారు. అభిమానుల కాంబినేషన్లో పవన్ సన్నివేశాలను రేపటి (ఆగష్టు 9) నుంచి 12 వరకూ హైదరాబాద్ - రామోజీ ఫిల్మ్ సిటీలో చిత్రీకరించనున్నట్టు చెప్పారు. ఈ నాలుగు రోజులు కూడా ఈ సినిమా షూటింగ్ అక్కడ ఉదయం 9 గంటల నుంచి సాయంత్రం 4 గంటల వరకు జరుగుతుందని అన్నారు. మొన్నామధ్య ట్విట్టర్ లో పోస్ట్ చేసిన వీడియోలో ... హైదరాబాద్ లోని అభిమానులు మాత్రమే రావాలంటూ పిలుపునిచ్చిన పూరీ, ఈసారి అలాంటి విషయాలేమీ చెప్పకపోవడం గమనించదగిన విషయం. 
    ఇదిలా ఉండగా,  రేపు ప్రపంచ వ్యాప్తంగా విడుదల కానున్న 'జులాయి' సినిమా విషయంలో, పవన్ కల్యాణ్ తన సొంత సినిమాలా బాధ్యత తీసుకున్నాడని అంటున్నారు. పోస్ట్ ప్రొడక్షన్ పనుల సమయంలో ఎక్కువగా దగ్గరుండి పర్యవేక్షించాడట. అలాగే, షూటింగు సమయంలో సైతం దర్శకుడు త్రివిక్రమ్ శ్రీనివాస్ కు, హీరో అల్లు అర్జున్ కూ కొన్ని సన్నివేశాల విషయంలో మంచి టిప్స్ ఇచ్చాడని చెబుతున్నారు. తమ కుటుంబానికి చెందిన బన్నీ ఫ్లాపుల్లో వుండడం, అలాగే, దర్శకుడు త్రివిక్రమ్ తనకు ఎంతో సన్నిహితుడు కావడం... దీనికి కారణమని అంటున్నారు.