Posted: 07/16/2012 07:52 PM IST

       ఇటీవల కాలంలో కొన్ని సినిమాల్లోని పాటల్లోని పదాలు చాలా పాపులర్ అవుతుంటాయి. వీటి పేరుతో గతంలో కొన్ని సినిమాలు కూడా వచ్చి విజయవంతంగా ప్రదర్శింపబడ్డాయి కూడా. ఫలితంగా హీరో మేనరిజం డైలాగుల్ని ఆ వెంటనే కొందరు తమ సినిమాలకు టైటిల్స్ గా పెట్టేస్తున్నారు. దీని వల్ల తమ సినిమా నలుగురి దృష్టిలోనూ పడి, మంచి హైప్ వస్తుందన్నది వాళ్ళ లెక్క. అలాగే, ఇటీవల వచ్చిన 'గబ్బర్ సింగ్' సినిమాలోని పవన్ కల్యాణ్ మేనరిజం (ఊతపదం) డైలాగైన 'నాక్కొంచం తిక్కుంది... దానికో లెక్కుంది' అన్నది కూడా ఇప్పుడు ఓ సినిమాకు టైటిల్ అయింది. ఈ పదాన్ని ఫిలిం చాంబర్లో తాజాగా రిజిస్టర్ చేశారు. ప్రస్తుతం 'గుడ్ మార్నింగ్' సినిమాని రూపొందిస్తున్న దర్శకుడు మురళి తన తదుపరి చిత్రం కోసం ఆ టైటిల్ని రిజిస్టర్ చేశాడు. 'గుడ్ మార్నింగ్' సినిమా పూర్తి కాగానే, 'నాక్కొంచం...' మొదలవుతుందని దర్శకుడు మురళి తెలిపారు. ఇదిలా ఉండగా,  'గబ్బర్ సింగ్' కథానాయిక శృతి హాసన్ సినిమాలకన్నా, తనకెంతో ఇష్టమైన మ్యూజిక్ కార్యక్రమాలకే ఎక్కువ ప్రాధాన్యత ఇస్తోందంటూ బాలీవుడ్ లో ప్రచారం జరుగుతోంది. కొన్నేళ్ల క్రితం తెలుగులో వచ్చిన 'నువ్వొస్తానంటే నేనొద్దంటానా' చిత్రాన్ని ప్రభుదేవా హిందీలో రీమేక్ చేస్తున్న సంగతి మనకు తెలిసిందే. ఇందులో కథానాయికగా శృతి హాసన్ ని తీసుకోవాలనుకుని ప్రభుదేవా ఎంతగానో ప్రయత్నించాడట.  అయితే, ఆమె ప్రస్తుతం MTV కోసం సంగీతప్రధానమైన 'MTV రష్' ప్రోగ్రాం షూటింగులో బిజీగా వుందట. బిజోయ్ నంబియార్ దర్శకత్వం వహిస్తున్న ఈ కార్యక్రమం 13 భాగాలుగా ప్రసారం అవుతుంది. ఇందులో శృతి తను రూపొందించిన మ్యూజిక్ ట్యూన్స్ కూడా వినిపిస్తూ, పెర్ఫార్మ్ చేస్తుంది.

...avnk