Posted: 05/23/2012 01:36 PM IST

ఒకప్పుడు తెలుగు చిత్ర సీమకు వచ్చిన ఏ హీరోయిన్ అయినా తారాస్థాయికి దూసుకుపోవాలంటే అతని చేతిలోంచి రావాల్సిందే. ఆ యువకుడి పక్కన నటించిన అందగత్తెలంతా వెండితెరమీద వెలిగిపోయారు. అతనెవరో కాదు.. నన్ అదర్ దేన్.. చంద్రమోహన్.  తెలుగు చిత్ర సీమలో మూడో తరానికి చెందిన హీరోయిన్లు అందరూ చంద్రమోహన్ తో నటించిన వారే. జయప్రద, జయసుధ, శ్రీదేవి, రాధిక, రాధ ఇలా ఆ నాటి హీరోయిన్ లంతా చంద్రమోహన్ చిత్రాల్లో నటించిన తర్వాతే పెద్ద హీరోయిన్ లు గా పేరు తెచ్చుకున్నారు. హీరో అయినా, క్యారెక్టర్ యాక్టర్ అయినా తండ్రి పాత్ర అయినా ఆ పాత్రలో ఒదిగిపోయే చంద్రమోహన్ అందాల నటుడు శోభన్ బాబు తర్వాత మహిళా అభిమానులు ఎక్కువగా ఉన్న హీరో.
 ఈ అందగాడు.. చంద్రమోహన్ కృష్ణా జిల్లా పమిడిముక్కల గ్రామంలో సరిగ్గా ఇదే రోజున అంటే మే 23వతేదీ 1943లో పుట్టారు. ఆయన అసలు పేరు మల్లంపల్లి చంద్రశేఖర్ రావు. బాపట్లలో బి.యస్.సి. చదివి సినిమాలలో నటించాలనే ఉత్సాహంతో మద్రాసు వెళ్లారు. హీరోగా రంగులరాట్నం చిత్రంతో చంద్రమోహన్ సినీ ప్రస్థానం మొదలైంది. ఆ తర్వాత  సహ నటుడిగా, హాస్యనటునిగా, క్యారెక్టర్ ఆర్టిస్ట్ గా ఎన్నో వైవిధ్యమైన పాత్రలు పోషించి ప్రేక్షకులను మెప్పించారు. ఎన్నో హిట్ చిత్రాలను అందించారు.  దాదాపు నాలుగు దశాబ్దాలుగా తెలుగు చిత్ర సీమలో ఓ వెలుగు వెలిగిన చంద్రమోహన్ పోషించని పాత్ర లేదు. హాస్య నటుడిగా కూడా పేరు తెచ్చుకున్న చంద్రమోహన్ మరిన్ని పుట్టినరోజు వేడుకలు జరుపుకోవాలని ఆంధ్రావిశేష్.కాం మనసారా ఆశిస్తోంది. హ్యాపీ బర్త్డే చంద్రమోహన్ జీ.

...avnk