Posted: 05/04/2012 04:32 PM IST

      దాసరి నారాయణరావు దంపతులు తెలుగు చిత్ర పరిశ్రమకి పెద్ద దిక్కుగా నిలిచారనే విషయంలో ఎవరికీ సందేహంలేదు. సినీరంగానికి సంబంధించిన విషయాల్లో భర్తకి చేదోడుగా వుంటూనే, రాజకీయ రంగంలో సైతం పద్మ తన ఉనికిని చాటుకోవటమేకాదు, ఎంతో మందికి మేలు చేయగలిగారు. అందుకే వారికి చిత్ర పరిశ్రమలో చెరగని ముద్ర పడింది.  ఇటీవల ఆమె స్వర్గస్తురాలు కావడంతో, సినీపరిశ్రమకి చెందిన చాలామంది ఓ పెద్ద దిక్కును కోల్పోయామంటూ కంటతడిపెట్టి ఘనంగా తమ నివాళులర్పించి తమ భక్తిభావాన్ని చాటుకున్నారు.
      కాగా, ఈ రోజు దర్శక రత్న దాసరి నారాయణ రావు పుట్టిన రోజు కావడంతో, ఓ చెరగని ముద్రను దాసరి తన ఇంటిముందు సాక్షాత్కరించుకున్నారు దాసరి. ఆయన తన సతీమణి పద్మ జ్ఞాపకార్ధం ఆమె విగ్రహాన్ని ఇంటి లోనే నెలకొల్పారు. తన ఇంటి ఆవరణలో ఏర్పాటు చేసిన పద్మ విగ్రహాన్ని ఆత్మీయుల సమక్షంలో ఆయన ఈ రోజు ఉదయం 10 గంటల ప్రాంతంలో ఆవిష్కరించారు. గత 35 ఏళ్లుగా తన పుట్టినరోజుని ఆమె ఎంతో ఘనంగా జరిపేదనీ, ఈ ఏడాది అవి తనకి జ్ఞాపకంగా మాత్రమే మిగిలాయని దాసరి నారాయణ రావు ఈ సందర్భంలో తీపి గుర్తులు నెమరువేసుకున్నారు. కాగా, ఈ కార్యక్రమానికి హాజరైన పలువురు చిత్ర ప్రముఖులు దాసరికి జన్మదిన శుభాకాంక్షలు తెలిపారు.
      తెలుగు చిత్ర సీమ కీర్తిని నలుదిశలా చాటడంలో విజయవంతమైన దాసరి నారాయణ రావు మరిన్ని పుట్టిన రోజులు పూర్తి ఆయురారోగ్యాలతో జరుపుకోవాలని ఆంధ్రావిశేష్.కాం ఆకాంక్ష.

...avnk