Posted: 04/16/2012 12:04 PM IST

      మెగా బ్రదర్స్ ముగ్గురూ చాలా కాలం తర్వాత ఒకే వేదిక పై పక్క పక్కనే కూర్చుని మరీ కనువిందు చేశారు. మెగా అభిమానులను విశేషంగా ఆకర్షించిన దానికి కారణం 'గబ్బర్ సింగ్' ఆడియో వేడుక.    చిరంజీవి, నాగబాబు, పవన్ కల్యాణ్ ముగ్గురూ కలిసి వేడుకలోని కార్యక్రమాలను తిలకించారు.
              హైదరాబాదులోని శిల్ప కళా వేదికలో ‘గబ్బర్ సింగ్’ ఆడియోను మెగాస్టార్ చిరు ఆవిష్కరించి పవర్ స్టార్ పవన్ కు అందించారు. అనంతరం మాట్లాడుతూ,  తమ్ముడు పవన్ కల్యాణ్ ని అన్న చిరంజీవి ఈ రోజు ఆకాశానికి ఎత్తేస్తూ పొగిడారు. "తమ్ముడు గురించి ఏం చెప్పుకోను... చిన్నప్పటి నుంచీ తను అందరిలోకీ డిఫరెంట్ గా ఉండేవాడు. అదే డిఫరెన్స్ ని ఈవేళ తన సినిమాల్లో కూడా చూపిస్తున్నాడు. తను నిజ జీవితంలో ఎలా ఉంటాడో, ఎలా ఆలోచిస్తాడో తన సినిమాల్లో కూడా అదే చూపిస్తాడు. సమాజానికి ఏదో చెప్పాలన్న తపన కనపడుతుంది. దేశభక్తి వుంటుంది. యువతకు దిశానిర్దేశం చేస్తాడు.           చిన్నప్పటి నుంచీ అమ్మాయిల పట్ల ఈవ్ టీజింగ్ చేసే వాళ్లని అసహ్యించుకునేవాడు. అదే తన సినిమాల్లోనూ చూపిస్తున్నాడు. విలన్ తో ఫైట్ చేసేటప్పుడు కూడా అదే కసి కనపడుతుంది తనలో. తన ఒరిజినల్ క్యారెక్టర్నితెరమీద చూపిస్తాడు. నిజాయతీకి మారు పేరు పవన్" అన్నారు  చిరంజీవి. ఇటీవల విడుదలైన రచ్చ ఒక రచ్చ అయితే, రేపు గబ్బర్ సింగ్ రచ్చ రచ్చ... పాటలన్నీ విన్నాను. ప్రతి పాటా బాగుంది. ఇప్పుడు విన్న 'కెవ్వు కేక' పాట నిజంగా కెవ్వు కేకే! ఇందాక విన్న 'దేఖో.. దేఖో' పాట చూస్తుంటే నాకు కూడా స్టేజ్ మీదకు వచ్చి డ్యాన్స్ చేయాలనిపించింది. కానీ, బాగుండదని ఆగిపోయాను... అక్కడికీ తట్టుకోలేక కూర్చున్న చోటే కాళ్ళు కదిపాను. రేపు దియేటర్లో ఇదంతా రచ్చ రచ్చే!" అన్నారు.            ఆ తర్వాత మాట్లాడిన పవన్ కల్యాణ్ రెండంటే రెండే ముక్కలు మాట్లాడి అభిమానుల్ని నిరాశపరిచాడనే చెప్పాలి. వినోదాన్ని పంచడం కోసం శాయశక్తులా కృషి చేస్తానని పవన్ అన్నారు. అంతకు ముందు మాట్లడిన నిర్మాత బండ్ల గణేష్, దర్శకుడు హరీష్ శంకర్ పవన్ ను ఆకాశానికి ఎత్తేశారు. నాకు పవన్ కళ్యాణ్ తో ఎప్పటినుంచో సినిమా తీయాలని ఉందని ఆ అవకాశం త్వరలో కల్పించాలని శ్రీను వైట్ల పవన్ కళ్యాణ్ ను కోరటం అందరినీ ఆనందానికి గురిచేసింది.                  ఈ వేడుకలో దేవిశ్రీ ప్రసాద్ చేసిన పెర్ఫార్మెన్స్ హైలైట్ గా నిలిచింది. శృతి హాసన్, అల్లు అర్జున్, బ్రహ్మానందం, అలీ, హరీష్ శంకర్, ఇంకా పలువురు దర్శకులు, నిర్మాతలు, వేలాదిగా మెగా అభిమానులు ఈ వేడుకలో పాల్గొన్నారు.

...avnk