Posted: 01/23/2012 06:13 PM IST

యుంగ్ హీరో దగ్గుబాటి రానా కొత్త చిత్ర షూటింగ్ షురూ అయింది. ‘కృష్ణం వందే జగద్గురుమ్’ పేరిట వస్తోన్న ఈ సినిమా చిత్రీకరణ ఇవాళ్టి నుంచే ప్రారంభమయింది. ఈ మూవీలో రానా సరికొత్త గా కనిపించబోతున్నారని సమాచారం. బీటెక్ బాబుగా విభిన్న శైలిలో రానా ప్రదర్శన ఉండనుందని భోగట్టా. అయితే హీరో రానా సరసన ఏ సుందరాంగి జోడీ కడుతుందనేది ఇంకా పైనలైజ్ కాలేదు.

జాగర్లమూడి సాయిబాబు నిర్మిస్తున్న ఈ సినిమా ఫస్ట్ ఫ్రేం ఎంటర్ టైన్మెంట్ బ్యానర్ పై నిర్మితమౌతోంది. దర్శకుడు క్రిష్ కు ఈ సినిమా మూడవది. గతంలో ఈయన ‘గమ్యం’, ‘వేదం’ వంటి విభిన్నతరహా చిత్రాలను రూపొందించి తెలుగు చిత్ర సీమలో తనదైన ముద్రను వేసుకున్నారు. సంగీతాన్ని ఎంఎం కీరవాణి అందిస్తున్నారు.

ఇక హీరో రానా విషయానికొస్తే, శేఖర్ కమ్ముల దర్శకత్వంలో వచ్చిన ‘లీడర్’ సినిమాతో తెరంగేట్రం చేశారు రానా. అనంతరం ఆయన ‘దమ్ మారో దమ్’ అనే హిందీ సినిమాలోనూ నటించారు. ఈమధ్య పూరీ జగన్నాథ్ దర్శకత్వంలో రూపొందిన ‘నేనూ నా రాక్షసి’ చిత్రంలో రానా అభిమన్యు పాత్రను పోషించారు. ప్రస్తుతం రానా నటిస్తోన్న ‘డిపార్ట్ మెంట్’ ‘నా యిష్టం’ సినిమాలు పోస్ట్ ప్రొడక్షన్ పనులు పూర్తిచేసుకుంటున్నాయి.

…avnk