Posted: 12/13/2011 04:38 PM IST

'ఆలీబాబా' అనే తమిళ చిత్రాన్ని 'అలీబాబా ఇంట్లో అందరూ దొంగలు' పేరుతో తెలుగులో వస్తోంది. శ్రీరమణ ఫిలిమ్స్‌ పతాకంపై వి. రమణ, వి. జ్యోతిలాల్‌ అనువదిస్తున్నారు. చిత్రానికి నిలాన్‌ కె. శేఖర్‌ దర్శకుడు. తమిళ దర్శకుడు విష్ణువర్ధన్‌ సోదరుడు కృష్ణ హీరోగా, జనని హీరోయిన్‌గా నటించింది. ఆడియో విడుదల ఆదివారం రాత్రి హైదరాబాద్‌లో జరిగింది. 'పంజా' దర్శకుడు విష్ణువర్ధన్‌ ఆడియోను విడుదల చేసి తన తమ్ముడు చిత్ర హీరో అయిన కృష్ణకు అందజేశారు.

ఈ సందర్భంగా ఆయన మాట్లాడుతూ...'కృష్ణ నా తమ్ముడు. ఈమధ్య నేను దర్శకత్వం వహించిన 'పంజా'ని హిట్‌ చేసి ఆదరించారు. మంచి కలెక్షన్లు వస్తున్నాయి. అలాగే నా తమ్ముడ్ని కూడా ఆదరిస్తారని ఆశిస్తున్నాను. నాకు నవదీప్‌ మంచి స్నేహితుడు. నేను తమిళంలో దర్శకత్వం వహించిన తొలి సినిమాకు తనే హీరో. నేను మొదటిసారి కథ రాసుకున్నప్పుడు హీరోలెవరూ అవకాశం ఇవ్వలేదు. నవదీప్‌ నాకు ఆ అవకాశం ఇచ్చాడు' అని చెప్పారు.

చిత్ర నిర్మాతలు తెలుపుతూ...'మా మొదటి సినిమానే విష్ణువర్ధన్‌ సోదరుడుతో చేయడం ఆనందంగా ఉంది. తమిళంలోలాగే ఇక్కడా హిట్‌ అవుతుందనే నమ్ముతున్నాం. విద్యాసాగర్‌ చక్కటి బాణీలు ఇచ్చారు. త్వరలో విడుదల చేయనున్నాం' అన్నారు.

నవదీప్‌ మాట్లాడుతూ..'తమిళంలో నా మొదటి సినిమాకు దర్శకుడు విష్ణువర్ధనే. తెలుగులో 'కలిసుంటే'గా రిలీజైంది. కాలక్రమేణా తను పెద్ద దర్శకుడు అయ్యాడు. 'పంజా' కూడా హిట్‌ అయింది. కృష్ణ కూడా మంచి స్నేహితుడు. ఇక్కడ తను సక్సెస్‌ కావాలని కోరుకుంటున్నా'నని అన్నారు.

బిందుమాధవి మాట్లాడుతూ...'కృష్ణతో తమిళంలో ఓ సినిమాను చేస్తున్నాను. తన మొదటి సినిమా తెలుగులోనూ హిట్‌ కావాలని కోరుకుంటున్నా'నని అన్నారు