Posted: 12/13/2011 04:22 PM IST

రవిరాజ పినిశెట్టి తనయుడు ఆది- తాప్సీల మధ్య ప్రేమాయణం మొదలు కానుంది. అది రియల్ లైఫ్‌లో కాదు రీల్ లైఫ్‌లో. కృష్ణవంశీ దర్శకత్వం వహించిన ‘మొగుడు’ చిత్రంలో నటించిన తాప్సీ ప్రస్తుతం తెలుగులో కేవలం ఒకే ఒక చిత్రంలో నటిస్తోంది. ఈ ముద్దుగుమ్మ త్వరలో తమిళంలో తెరకెక్కనున్న ఓ ప్రేమకథా చిత్రంలో నటించనుంది. ఇందులో కథానాయకుడిగా ఆది నటించనున్నాడు. కుమార్ దర్శకత్వం వహించనున్న ఈ చిత్రానికి ప్రముఖ సంగీత దర్శకుడు ఇళయరాజా సంగీతం అందించనున్నారు. ‘శ్రీరామరాజ్యం’ వంటి చిత్రం తర్వాత ఇళయరాజా సంగీతం అందించనున్న చిత్రం ఇదే కావడం విశేషం.

ఆది, తాప్సీల తొలి కలయికలో రూపొందనున్న ఈ ప్రేమకథా చిత్రం తెలుగు, తమిళ భాషల్లో తెరకెక్కనుందని తెలుస్తోంది. వసంతబాలన్ దర్శకత్వం వహించిన ‘అరవాన్’ చిత్రంలో విభిన్నమైన గెటప్‌లో ఆది నటించాడు. ఈ చిత్రం తెలుగులో ‘ఏకవీర’ పేరుతో విడుదల కానుంది. ఆ తర్వాతే ఆది, తాప్సీల కాంబినేషన్‌లో కుమార్ తెరకెక్కించనున్న ద్విభాషా చిత్రం సెట్స్ పైకి వెళ్లనుందని తెలుస్తోంది. ధనుష్‌తో ‘ఆడుకాలం’, జీవాతో ‘వాందాన్ వేండ్రాన్’(వచ్చాడు గెలిచాడు) చిత్రాల తర్వాత తమిళంలో తాప్సీ చేస్తున్న మూడవ చిత్రమిదే.